झापा। झापा बाह्रदशी–५, फूलबारीस्थित विक्रम विकास मेडिकलबाट प्रतिबन्धित औषधिहरू बिक्री भइरहेको अवस्थामा संचालक बन्दना पोखरेललाई प्रहरीले पक्राउ गरेको छ। मेडिकल कचनकवल–१ स्थित स्वास्थ्य चौकीका इन्चार्ज अहेव बिक्रम राजवंशीको नाममा दर्ता रहेको भए पनि बिक्री पोखरेलले गर्दै आएकी थिइन्।

जिल्ला प्रहरी कार्यालयको टोलीले छापा मार्दा ट्रामाडोल ७९५, एन्टीकोफ ४७० र डिक्लोमिन ३९८० ट्याब्लेट बरामद गरिएको डीएसपी खगेन्द्र खड्काले जानकारी दिए! स्थानीय तहले पूर्वसूचना दिएर पनि अहेव राजवंशीले अटेर गर्दै औषधि बिक्री गरिरहेकाले यो कारबाही ढिला भए पनि आवश्यक रहेको जनाइएको छ।

स्वास्थ्य चौकीकै जिम्मेवार कर्मचारीबाट प्रतिबन्धित औषधिको कारोबार हुनुले स्थानीय स्वास्थ्य प्रणालीमा गम्भीर प्रश्न उठाएको छ। यस घटनाले सरकारी निगरानी प्रणालीको कमजोरी र औषधि नियमनमा रहेको खुकुलोपनसमेत उजागर गरेको छ।