गाँजा सहर। दक्षिणी गाजाको खान युनिस शरणार्थी शिविरमा भएको इजरायली हवाई आक्रमणमा कम्तीमा ११ जना प्यालेस्टिनीको मृत्यु भएको छ। मृत्यु हुनेमा एक वर्षभन्दा कम उमेरका तीन शिशु पनि छन्।
नागरिक सुरक्षा प्रवक्ता महमुद बास्सालका अनुसार आक्रमणमा ज्यान गुमाउनेहरू एउटै विस्तारित परिवारका सदस्य हुन्। पहिचान भएका आठजनामध्ये एक वर्षका बालक, एक वर्षकी बालिका र एक महिनाको शिशु रहेका छन्। इजरायली सेनाका प्रवक्ताले आक्रमणको पुष्टि गर्दै सो कारबाही ‘विद्रोही हमास सदस्यलाई लक्षित गरी गरिएको’ बताएका छन्।
इजरायलले दुई महिनाको युद्धविरामपछि पुनः आक्रमण सुरु गरेको हो। यो युद्ध सन् २०२३ अक्टोबर ७ मा हमासद्वारा गरिएको आक्रमणपछि सुरु भएको थियो। गाजाको स्वास्थ्य मन्त्रालयका अनुसार मार्च १८ पछि पुनः सुरु भएको आक्रमणदेखि हालसम्म कम्तीमा दुई हजार ३९६ जनाको मृत्यु भइसकेको छ। यससँगै कुल मृतकको संख्या ५२ हजार ४९५ पुगेको बताइएको छ।
यसअघि शुक्रबार मात्रै इजरायली आक्रमणमा कम्तीमा ४२ जनाको मृत्यु भएको गाजाको नागरिक सुरक्षा निकायले जनाएको थियो। यो क्षेत्र मार्च २ देखि पूर्ण इजरायली नाकाबन्दीअन्तर्गत रहँदै आएको छ। इजरायलले हमासले मानवीय सहायतामा अप्ठ्यारो पारिरहेको आरोप लगाउँदै गाजामा सहयोग सामग्री पठाउने कार्य रोकेको छ। इजरायली पक्षले नाकाबन्दीले हमासमाथि बन्धकमुक्त गराउने दबाब सिर्जना गर्ने उद्देश्य रहेको दाबी गरेको छ।
