भारत–पाकिस्तान तनाव मत्थर भएसँगै रोकिएको आईपीएल क्रिकेट आजदेखि पुनः सुरु

काठमाण्डौ। भारत र पाकिस्तानबीच बढेको तनावका कारण स्थगित भएको इन्डियन प्रिमियर लिग (आईपीएल) क्रिकेटका बाँकी खेलहरु आजदेखि पुनः सुरु भएका छन्। दुई देशबीच युद्धविरामको घोषणा भएसँगै क्रिकेट प्रतियोगिता सुचारु गर्ने निर्णय भएको हो।

परिमार्जित तालिका अनुसार आजको पहिलो खेल रोयल च्यालेन्जर्स बेङ्गलुरु (आरसीबी) र कोलकाता नाइट राइडर्सबीच बेङ्गलुरुमा नेपाली समय अनुसार बेलुका पौने ८ बजे सुरु भएको छ।

प्रतियोगिताको अंक तालिकामा बेङ्गलुरु ११ खेलमा १६ अंकका साथ दोस्रो स्थानमा छ भने कोलकाता १२ खेलमा ११ अंक जोडेर छैटौं स्थानमा रहेको छ। यसअघि, अप्रिल २२ तारिखमा पहलगाममा भएको आतंकवादी आक्रमणपछि भारत र पाकिस्तानबीचको सम्बन्ध थप बिग्रिएको थियो। यसै कारण मे ८ तारिखमा धर्मशालामा पन्जाब किङ्ग्स र दिल्ली क्यापिटल्सबीच भइरहेको खेल पूरा नहुँदै स्थगित गरिएको थियो।

यद्यपि, अघिल्लो हप्ता शनिबार दुई देशबीच युद्धविरामको सहमति भएपछि आईपीएल क्रिकेट फेरि सुरु गर्ने निर्णय आयोजकले गरेको हो। नयाँ तालिका अनुसार आईपीएलको क्वालिफायर खेल जेठ १५ गते र इलिमिनेटर खेल जेठ १६ गते हुनेछ। दोस्रो क्वालिफायर जेठ १८ गते हुनेछ भने फाइनल खेल जेठ २० गते हुनेछ।

लामो समयपछि आईपीएलका बाँकी खेलहरु सुरु भएकाले क्रिकेटप्रेमीहरु उत्साहित भएका छन्। आजको खेलमा दुवै टोली जित निकाल्दै प्रतियोगितामा आफ्नो स्थान थप बलियो बनाउन प्रतिस्पर्धा गर्ने अपेक्षा गरिएको छ।