मोरङ। मोरङको उर्लाबारीस्थित मदन भण्डारी अस्पताल तथा ट्रमा सेन्टरमा कार्यरत दुई कर्मचारी ड्युटी समयमा मादक पदार्थ सेवन गरेको आरोपमा निलम्बनमा परेका छन्।

बिहीबार राति ड्युटीमा रहनुपर्ने ती कर्मचारीहरू अस्पताल परिसरबाहिर मादक पदार्थ सेवन गरिरहेको अवस्थामा स्थानीय युवाहरूले फेला पारेका थिए। उनीहरूले तत्काल दुवै जनालाई नियन्त्रणमा लिएर अस्पताल प्रशासनको जिम्मा लगाएका थिए।

प्रशासन स्रोतका अनुसार नियन्त्रणमा परेकामध्ये एक जना कार्यालय सहयोगी र अर्का जना पारा–मेडिक्स रहेका छन्। अस्पतालका मेडिकल सुपरिटेन्डेन्ट डा. रवि शाहले प्रारम्भिक अनुसन्धानपछि दुवै जनालाई तत्काल विभागीय कारबाहीस्वरूप निलम्बन गरिएको जानकारी दिए।

“घटनाको थप अनुसन्धान भइरहेको छ,” उनले भने, “व्यवस्थापन समितिको बैठकपछि आवश्यक निर्णय लिइनेछ।”अस्पताल प्रशासनले यस्ता गैरजिम्मेवार र अनुशासनविहीन गतिविधिप्रति शून्य सहनशीलताको नीति अपनाएको जनाएको छ। साथै, सेवा प्रवाहमा कुनै प्रकारको सम्झौता नहुने पनि स्पष्ट पारेको छ। निलम्बनमा परेका कर्मचारीहरूको नाम हाल सार्वजनिक गरिएको छैन।