काठमाडौँ। काठमाडौँ महानगरपालिकामा ढल निर्माणको ठेक्कामा भएको भनिएको अनियमितताको विषयमा अख्तियार दुरुपयोग अनुसन्धान आयोगले बुधबार विशेष अदालतमा मुद्दा दायर गरेको छ।

यो प्रकरणमा महानगरपालिकाका तत्कालीन प्रमुख प्रशासकीय अधिकृत (हाल सूचना तथा प्रसारण विभागका महानिर्देशक) प्रदीप परियारसहित ७ जनालाई सार्वजनिक सम्पत्ति हानी नोक्सानी गरी भ्रष्टाचार गरेको आरोपमा प्रतिवादी बनाइएको छ। अख्तियारले जारी गरेको विज्ञप्तिमा यो जानकारी दिइएको हो।

अख्तियारका अनुसार, यो अनियमितता सामाखुसी कोरिडोर अन्तर्गत बसुन्धरादेखि म्हेपीसम्मको ढल निर्माण सम्बन्धी ठेक्कामा भएको थियो। यसमा समानान्तर सेवा प्रालिले सबैभन्दा कम मूल्य (करसहित रु. १८ करोड ९ लाख २२ हजार ३२५.६३) कबोल गरे पनि मिलेमतोमा उक्त कम्पनीलाई अयोग्य ठहर गरिएको थियो। त्यसको सट्टा दोस्रो कम कबोल (रु. २२ करोड ४० लाख ९४ हजार ६१२.९५) गर्ने कल्पवृक्ष–कोहिनुर जेभीसँग सम्झौता गरिएको थियो। यस कार्यका कारण काठमाडौँ महानगरपालिकालाई रु. ४ करोड ३१ लाख ७२ हजार २८७.३२ को हानि भएको अख्तियारले जनाएको छ।

अख्तियारले यस प्रकरणमा परियारसहित कर्मचारीहरु रबिनमान श्रेष्ठ, शिवराज अधिकारी, बसन्त आचार्य, नमराज ढकाल, सहायक निर्देशक उत्तम दाहाल र इन्जिनियर जनार्दन गिरीलाई प्रतिवादी बनाएको छ। आयोगले भ्रष्टाचार निवारण ऐन, २०५९ को दफा १७ तथा १९ अनुसार सबै प्रतिवादीहरुलाई बिगो असुलसहित कैद र जरिवाना सजायको मागसहित विशेष अदालतमा मुद्दा दायर गरेको अख्तियारका सहायक प्रवक्ता देवी प्रसाद थपलियाले जानकारी गराएका छन्।