सत्ताको आडमा गरिएको प्रहरी दमन नरोके कडा संघर्षमा उत्रिने नेकपा मकवानपुरको चेतावनी

मकवानपुर । नेपाल कम्युनिस्ट पार्टी मकवानपुरले सत्ताको आडमा मच्चाएको प्रहरी आतंक र दमन तत्काल नरोके कडा संघर्षका कार्यक्रम सहित अघि बढ्ने चेतावनी दिएको छ । जिल्ला सेक्रेटरी पेमा सीले एक विज्ञप्ति जारी गर्दै उक्त वक्तव्य व्यक्त गरेका हुन् ।

२०८२ असार ३ गते हेटौंडा-१ चौकिटोल स्थित सार्वजनिक जग्गा प्रकरणमा मुछिएको र सुकुम्बासीको माग सुनुवाइ नगरेको आरोपमा केहि सुकुम्बासीहरुले वडाध्यक्ष सबिन न्यौपाने माथि कालोमोसो दलि सांकेतिक कारबाही गरेका थिए । उक्त विषयसँग जोडेर बिक्रम थिङ सहित ५ जना निर्दोष सुकुम्बासी र सन्जिब रुम्बालाई बिनागल्ती अन्धाधुन्ध गरिएको धरपकटको एक विज्ञप्ति जारी गर्दै नेकपा मकवानपुरले घोर भर्त्सना गरेको छ ।

असार १९ गते बिहीवार जारी गरेको विज्ञप्ति मार्फत बिनाकारण गिरफ्तार गरिएका युवाहरुलाई निसर्त रिहा गर्न माग गरेको छ । सुकुम्बासी जनताको जायज माग पूरा नगरी सत्ताको आडमा कानुनलाई नै हातमा लिएर प्रहरी प्रशासन प्रयोग गरि जनताको घरगोठ खनतलासी गर्ने, निर्दोष जनतालाई कुटपिट गर्ने, गिरफ्तार गरि झुट्ठा मुद्दामा फसाउने जस्ता आतंकित घटनाको विरुद्धमा सबै सचेत नागरिक, न्यायका लागि बोल्ने दलहरु, सन्चारकर्मी तथा मानवअधिकारकर्मीलाई घटनाको सत्यतथ्य छानबिन गरि दमनको प्रतिरोध गर्दै सुकुम्बासी जनताको न्यायका लागि साथ दिन नेकपा मकवानपुरले अनुरोध गरेको छ । साथै प्रहरी प्रशासनको दमन रोक्न राज्यका सबै सरोकारवाला र सम्बन्धित निकायमा विज्ञप्ति मार्फत अपिल गरेको छ ।

पार्टीले हिरासतमा रहेका बन्दिहरुलाई रिहा नगर्ने र प्रहरी दमन नरोक्ने हो भने जनताको न्यायका लागि कडा संघर्षका कार्यक्रम लिएर अघि बढ्ने भनी विज्ञप्ति मार्फत जानकारी गराइएको छ । साथै जनप्रतिनिधिको गलत कार्य रोक्न, सार्वजनिक जमिनको रक्षा र भूमिहीन सुकुम्बासीको व्यवस्थापन गर्न राज्यका निकायहरु जिल्ला प्रशासन कार्यलय, भूमी समस्या समाधान आयोग र हेटौंडा उपमहानगरपालिकालाई अनुरोध गरेको छ ।