स्वास्थ्य मन्त्रालयका सबै कार्यसम्पादन मूल्याङ्कन फारम जलेर नष्ट, पुनः भराउन निर्देशन

काठमाडौं, अशोज २१ गते । स्वास्थ्य तथा जनसंख्या मन्त्रालयको कर्मचारी प्रशासन शाखाले मन्त्रालयमा रहेका निजामती सेवा र स्वास्थ्य सेवाका कर्मचारीहरूको कार्यसम्पादन मूल्याङ्कन (का.स.मू.) फारमहरू जलेर पूर्णरूपमा नष्ट भएको जनाएको छ।

मन्त्रालयका अनुसार अघिल्ला आर्थिक वर्षहरूमा मूल्याङ्कन भइसकेका साथै चालु आर्थिक वर्ष २०८१/८२ का मूल्याङ्कनमा रहेका सबै फारमहरू आगलागीका कारण जलेर नष्ट भएका हुन्।

यस सम्बन्धमा नेपाल सरकार मन्त्रिपरिषद्को २०८२ असोज ५ गतेको निर्णय र संघीय मामिला तथा सामान्य प्रशासन मन्त्रालयको पत्र (च. नं. ९२, मिति २०८२/०६/१२) बमोजिम, कर्मचारीहरूले पुनः कार्यसम्पादन मूल्याङ्कन फारम भरी पुनः दर्ता गर्न निर्देशन दिइएको छ।

मन्त्रालयले सबै सम्बन्धित निजामती सेवा र स्वास्थ्य सेवा तर्फका कर्मचारीलाई मिति २०८२ असोज २२ देखि २८ गतेभित्र आ.व. २०८१/८२ का मूल्याङ्कन फारम भरी दर्ता गराउन आग्रह गरेको छ। फारमहरू सुपरिवेक्षक र पुनरावलोकनकर्ताबाट मूल्याङ्कन गराई निजामती सेवा नियमावली २०५० को अनुसूची १५ तथा स्वास्थ्य सेवा नियमावलीको अनुसूची १७ (क) अनुसार पेश गर्न भनिएको छ।

कार्यालय प्रमुख र अधिकृत एघारौँ तहका कर्मचारीहरूको मूल्याङ्कन भने मन्त्रालयमा नै उपलब्ध गराइने मन्त्रालयले जनाएको छ।

मन्त्रालयका शाखा अधिकृत शोभा कुमारी चौलागाईंले सचिवस्तरको मिति २०८२/०६/२१ को निर्णयअनुसार उक्त निर्देशन जारी गरिएको जानकारी दिए।