अपाङ्गता दिवसको अवसरमा हेटौंडामा रक्तदान कार्यक्रम सम्पन्न, ४० जनाले दिए रक्तदान

हेटौंडा, मंसिर १८ गते । अपाङ्गता भएका व्यक्तिको ३४औँ अन्तर्राष्ट्रिय दिवसको अवसरमा बागमती प्रदेश सरकार सामाजिक विकास मन्त्रालय, मकवानपुर अपाङ्ग उत्थान समाजको आयोजना तथा राष्ट्रिय अपाङ्ग महासंघ नेपाल बागमती प्रदेशको समन्वय र नेपाल रेडक्रस सोसाइटीको प्राविधिक सहयोगमा हेटौंडामा रक्तदान कार्यक्रम सम्पन्न गरिएको छ।

संयुक्त राष्ट्रसंघले सन् १९९२ देखि मनाउँदै आएको अन्तर्राष्ट्रिय अपाङ्गता दिवस यस वर्ष “Fostering Disability Inclusive Societies for Advancing Social Progress” भन्ने अन्तर्राष्ट्रिय नारा तथा “अपाङ्गता समावेशी समाजको प्रवर्द्धन: सामाजिक उन्नतिको संवर्द्धन” भन्ने राष्ट्रिय मूल नारासहित मनाइँदैछ। त्यसकै सामाजिक उत्तरदायित्व र मानव सेवा भावनालाई मूर्त रूप दिन यो रक्तदान कार्यक्रम आयोजना गरिएको आयोजक संस्थाले जनाएको छ।

कार्यक्रममा माननीय बागमती प्रदेशसभा सदस्य एकलाल श्रेष्ठ प्रमुख अतिथिका रूपमा उपस्थित भएका थिए भने मकवानपुर अपाङ्ग उत्थान समाजका अध्यक्ष ठाकुरराम थापाले कार्यक्रमको अध्यक्षता गरेका थिए। प्रमुख अतिथि श्रेष्ठले रक्तदानलाई “मानव जीवन रक्षासँग जोडिएको उच्चतम सामाजिक सेवा” भन्दै समाजका सबै तहमा समावेशीता विस्तार गर्न आफू प्रतिबद्ध रहेको बताए।

त्यस्तै, राष्ट्रिय अपाङ्ग महासंघ नेपाल बागमती प्रदेशका अध्यक्ष उपेन्द्र श्रेष्ठले रक्तदान कार्यक्रमले अपाङ्गता भएका व्यक्तिहरू सेवाग्राही मात्र नभई समाजका सक्रिय योगदानकर्ता पनि हुन् भन्ने सन्देश बलियो रूपमा स्थापित गरेको उल्लेख गरे।

अन्य अतिथिहरूले पनि रक्तदान जीवनदान भएको उल्लेख गर्दै यस्ता सामाजिक सेवा कार्यक्रमहरूले समावेशी सहकार्य, संवेदनशीलता र सामाजिक उत्तरदायित्वलाई थप सबल बनाउने धारणा व्यक्त गरे।

कार्यक्रममा सामाजिक विकास मन्त्रालयका नि. सचिव अमृत अधिकारी, सुरक्षाङ्गका प्रमुख, राष्ट्रिय मानव अधिकार आयोगका प्रतिनिधि, अपाङ्ग महासंघका पदाधिकारी, विभिन्न संघसंस्थाका प्रतिनिधि, स्वयंसेवी तथा युवाहरूको उल्लेखनीय सहभागिता थियो। कार्यक्रममार्फत ४० जनाले रक्तदान गरेका छन्।

यसै अवसरमा दृष्टिविहीन महिला टी–ट्वान्टी विश्वकप क्रिकेट प्रतियोगितामा उपविजेता बनेकी मकवानपुरकी खेलाडी देवकी थापा मगरलाई विशेष सम्मान पनि प्रदान गरिएको थियो।