निर्वाचन आयोगको निर्णय: नेपाली कांग्रेसको आधिकारिक नेतृत्व गगन थापालाई, देउवा पक्ष चिन्ह विहीन

काठमाडौं, माघ २ गते । निर्वाचन आयोगले गगनकुमार थापाको नेतृत्वमा रहेको नेपाली कांग्रेसलाई आधिकारिकता प्रदान गरेको छ। शुक्रबार बसेको आयोगको बैठकले विशेष महाधिवेशनबाट चयन भएको थापा नेतृत्वको केन्द्रीय कार्य समितिलाई वैधानिक ठहर गर्दै पार्टीको चुनाव चिन्ह ‘रुख’ र चारतारे झण्डाको अधिकारसमेत सुम्पिएको हो।

राजधानीको भृकुटीमण्डपमा पुष २७ देखि ३० सम्म सम्पन्न विशेष महाधिवेशनमा बहुमत महाधिवेशन प्रतिनिधिको उपस्थितिमा गगन थापा सभापतिमा निर्वाचित भएका थिए। सभापति चयन भएपछि बिहीबार बसेको केन्द्रीय समिति बैठकको निर्णय सहित थापा निर्वाचन आयोग पुगेका थिए। आयोगले पेश भएका सम्पूर्ण कागजात अध्ययन गरेपछि थापा नेतृत्वको समितिलाई आधिकारिक मान्यता दिएको जनाएको छ।

यस निर्णयसँगै विशेष महाधिवेशनले गरेका सबै निर्णयहरू वैध भएका छन्। विशेष महाधिवेशन अमान्य रहेको दाबी गर्दै आएको शेरबहादुर देउवा समूहको माग स्वतः अस्वीकृत भएको छ। अब पार्टीभित्र प्रत्यक्ष मनोनयन देखि अन्य सम्पूर्ण संगठनात्मक निर्णय र कारबाही गगन थापा नेतृत्वको समूहबाट हुनेछन्।

निर्वाचन आयोगको निर्णयपछि शेरबहादुर देउवा नेतृत्वको पुरानो कार्य समिति स्वतः अमान्य भएको छ। आयोगले देउवा पक्षलाई दलको नयाँ नाम र चुनाव चिन्ह रोज्न समय दिने तयारी गरेको छ। यद्यपि आयोगको निर्णय प्रति असन्तुष्ट पक्षलाई सर्वोच्च अदालत जाने कानुनी बाटो भने खुला नै रहेको छ।

यसअघि आयोगको निर्णय नआउँदै देउवा पक्षले प्रतिकूल फैसला आए आन्दोलनमा उत्रिने चेतावनी दिएको थियो। कार्यवाहक सभापति पूर्णबहादुर खड्काले पत्रकार सम्मेलन गर्दै संविधान, कानुन र पार्टी विधान विपरीत निर्णय भए देशभर आन्दोलन गर्ने चेतावनी दिएका थिए। तर आयोगले सबै प्रक्रिया अध्ययन गरी गगन थापा नेतृत्वको कार्यसमितिलाई नै वैधानिक कांग्रेस ठहर गरेको छ।

निर्वाचन आयोगको यो निर्णयसँगै नेपाली कांग्रेसको आन्तरिक शक्ति सन्तुलनमा ठूलो फेरबदल आएको छ भने नेपाली राजनीतिमा यसले थप तरंग सिर्जना गर्ने अपेक्षा गरिएको छ।