रमेश परियारप्रति नेकपा (माओवादी) मकवानपुरद्वारा श्रद्धाञ्जली, परिवारजनमा समवेदना

हेटौंडा, माघ २ गते । हेटौंडा–१, जरुवाटोल निवासी रमेश परियारको असामयिक निधनप्रति नेकपा (माओवादी) मकवानपुरले श्रद्धाञ्जली अर्पण गरेको छ । साथै पार्टीले शोकसन्तप्त परिवारजनप्रति गहिरो समवेदना व्यक्त गरेको छ ।

लामो समयदेखि पार्टी संगठनमा आवद्ध रहँदै विभिन्न राजनीतिक तथा सामाजिक कार्यक्रमहरूमा सक्रिय भूमिका खेल्दै आएका परियार नेकपा (माओवादी) हेटौंडा–१ की सेक्रेटरी शुक्रमाया वाइबाका जीवनसाथी हुन् । सुगर र प्रेसरलगायत विभिन्न रोगबाट ग्रस्त भई लामो समयदेखि उपचाररत परियारको मिति २०८२ साल पौष २० गते निधन भएको हो । मिति २०२३ जेठ ५ गते जन्मिएका परियारको अल्पायुमै भएको निधनले परिवार, आफन्त र पार्टी पंक्तिलाई स्तब्ध बनाएको छ ।

समाज र देशका लागि पार्टी संगठनमार्फत उनले पुर्‍याएको योगदानको कदर गर्दै नेकपा (माओवादी) मकवानपुरले निधनको १३औँ दिन श्रद्धाञ्जली कार्यक्रम आयोजना गरेको हो । कार्यक्रममा पार्टीका स्थायी समिति सदस्य तथा मधेस प्रदेश इन्चार्ज अनिल सी, केन्द्रीय सदस्य तथा मकवानपुर इन्चार्ज राम सी, सेक्रेटरी पेमा सीलगायत नेताहरूको उपस्थिति रहेको थियो ।

कार्यक्रममा सहभागी नेताहरूले दिवंगत परियारप्रति श्रद्धाञ्जली अर्पण गर्दै शोकसन्तप्त परिवारजनलाई धैर्य धारण गर्न ढाडस दिएका छन् । पार्टीले दुःखको यस घडीमा परिवारसँगै रहने प्रतिबद्धता समेत व्यक्त गरेको छ ।