मेला सञ्चालनमा कानुनी पालना नभए खबरदारीदेखि कानुनी उपचारसम्म जानेछौँ” – अध्यक्ष विशाल राज महत

हेटौंडा, माघ २ गते । हेटौंडा उपमहानगरपालिकामा सञ्चालन हुने मेला तथा महोत्सवहरू कानुन, कार्यविधि र जनसरोकारअनुसार नै हुनुपर्ने भन्दै सामाजिक अभियन्ता तथा सेवा–सहयोग र आवाज समूहका अध्यक्ष विशाल राज महतले सु-सासनको पहल स्वरूप स्पष्ट धारणा सार्वजनिक गरेको छ।

उनले सामाजिक सञ्जालमार्फत सार्वजनिक गरेको स्टाटसमा हेटौंडा उपमहानगरपालिकाले मेला सञ्चालनको अनुमति दिने अधिकार राख्ने र हेटौंडा राजपत्र २०८२/०२/२३ अनुसार जारी मेला, महोत्सव तथा प्रदर्शनी सञ्चालन तथा व्यवस्थापन कार्यविधि अनिवार्य रूपमा लागू हुने उल्लेख गरेको छ। सो कार्यविधिअनुसार नगरप्रमुख स्वयं अनुगमन संयोजक रहने व्यवस्था रहेको पनि स्मरण गराइएको छ।

स्टाटसमा मेलाको उद्देश्य केवल मनोरञ्जन र स्टल सीमित नभई कानुनी दायित्व, सार्वजनिक जिम्मेवारी र जन-सुरक्षासँग जोडिएको कार्य भएको उल्लेख गरिएको छ। आयोजक संस्थाले दर्शकको बीमा, सुरक्षा व्यवस्थापन, दुर्घटनाको क्षतिपूर्ति तथा कानुनी उत्तर-दायित्व वहन गर्नुपर्ने स्पष्ट गरिएको छ। नियम उल्लंघन भए अनुमति रद्द, जरिवाना वा फौजदारी कारबाहीसम्म हुनसक्ने चेतावनी पनि दिइएको छ।

त्यसैगरी मेला सञ्चालन समय, मनोरञ्जन शुल्क, प्रवेश शुल्क, स्टल बुकिङमा स्थानीय व्यवसाय, बागमती प्रदेशभित्र उत्पादित वस्तु, नयाँ प्रविधि र हेटौंडा उपमहानगरभित्रका व्यवसायलाई प्राथमिकता दिनुपर्ने प्रावधान स्मरण गराइएको छ।

अश्लील कार्यक्रम, जुवा, लटरी, मादक तथा लागूपदार्थ निषेध, ध्वनि प्रदूषण नियन्त्रण, खाद्य स्वच्छता, प्राथमिक उपचार कक्ष, आपतकालीन सम्पर्क नम्बर सार्वजनिक, कर–शुल्क पारदर्शिता तथा मेला सम्पन्नपछि प्रतिवेदन बुझाउनुपर्ने अनिवार्यतामा विशेष जोड दिइएको छ।

अध्यक्ष महतले “कानुन पालना हाम्रो पहिलो अनुरोध हो, पालना नभए खबरदारी, ध्यानाकर्षण र कानुनी उपचारसम्म जान हामी प्रतिबद्ध छौँ” भन्दै यसलाई सु-सासन कार्यान्वयनको पहिलो कदमका रूपमा लिन आग्रह गरेको छ।