“भाषण होइन, निरन्तर संघर्ष र जनसेवामै माओवादी” : घरदैलो अभियानमा रामबहादुर घलान (वाटर)

हेटौँडा, माघ २० गते । मकवानपुर क्षेत्र नम्बर २ मा प्रतिनिधिसभा सदस्यका उम्मेदवार रामबहादुर घलान (वाटर) ले चुनाव जित्नु वा हार्नु भन्दा पनि जनताका मुद्दा निरन्तर उठाइरहने प्रतिबद्धता व्यक्त गरेका छन्। रेडियो भरोसाको युट्युब च्यानलमार्फत प्रसारित निर्वाचन विशेष संवाद कार्यक्रममा बोल्दै उनले आफू नेपाल कम्युनिस्ट पार्टी (माओवादी) को तर्फबाट गुलाब चिन्ह लिएर घरदैलो अभियानमा रहेको जानकारी गराएका हुन्।

घरदैलो अभियानलाई तीव्र बनाइरहेका घलानले अभियानका क्रममा जनताबाट अपार माया र विश्वास पाएको बताए। उनका अनुसार जनताले माओवादी पार्टीलाई देश बचाउने, किसान, सुकुम्बासी, श्रमिक तथा जेन–जि पुस्ताको आवाज उठाउने वास्तविक पार्टीको रूपमा लिएका छन्। विशेषतः मध्यवर्ती क्षेत्र, उत्तरी भेगका जनताको जीविकोपार्जन, गाँजा खेतीलाई वैकल्पिक आयआर्जनको रूपमा कानुनी मान्यता दिनुपर्ने विषय, र चुनाव लक्षित महँगीविरुद्ध माओवादीले सशक्त आवाज उठाउँदै आएको उनले स्पष्ट पारे।

घलानले माओवादी पार्टी सत्तामा हुँदा मात्र होइन, सत्ताबाहिर रहँदा पनि जनतासँगै रहेर संघर्ष गर्दै आएको दाबी गरे। प्रतिनिधिसभामा पुगे संविधान पुनर्लेखन, कानुन संशोधन, जनतामुखी नीति निर्माण र जनजीविकासँग जोडिएका मुद्दामा पार्टीले निर्णायक भूमिका खेल्ने उनको भनाइ थियो।

कार्यक्रम प्रस्तोताले ‘चुनावी एजेन्डा जितेपछि भुल्ने प्रवृत्ति’ सम्बन्धी प्रश्न उठाउँदा घलानले सुकुम्बासी समस्या, लघुवित्त पीडित, हेटौंडा सरकारी अस्पताल जोगाउने विषय, सडक विस्तारका कारण प्रभावित नागरिकको मुआब्जा, सार्वजनिक जग्गा संरक्षण, आरक्षण क्षेत्रका मुद्दा तथा एमसीसीविरुद्धको आन्दोलन जस्ता विषयहरू चुनावअघि र चुनावपछि पनि निरन्तर उठाइरहने बताए।

हालसम्म आठ–नौ वटा वडामा घरदैलो अभियान सम्पन्न भइसकेको जानकारी दिँदै उनले सबै ठाउँमा सकारात्मक प्रतिक्रिया पाएको बताए। क्षेत्र नम्बर २ मा २१ जना उम्मेदवार प्रतिस्पर्धामा रहे पनि जनताको भरोसा माओवादीप्रति बढ्दो रहेको उनको दाबी छ।

हार–जित दुवै स्वीकार्य हुने उल्लेख गर्दै घलानले जनताले मत नदिए पनि आफू जनताको सेवामा निरन्तर रहने प्रतिबद्धता जनाए। अन्त्यमा उनले मकवानपुर क्षेत्र नम्बर २ का आमाबुवा, दाजुभाइ, दिदीबहिनी तथा सम्पूर्ण जेन–जि पुस्तालाई गुलाब चिन्हमा अत्याधिक मत दिएर विजयी गराउन हार्दिक अपिल गरे।