हेटौंडा: मकवानपुर जिल्लाको मनहरी गाउँपालिकामा हाजिरीजवाफ प्रतियोगिता आयोजना गरेको छ । ५९ औं राष्ट्रिय बाल दिवसको अवसरमा शुक्रबार  राष्ट्रिय माध्यमिक विद्यालय सुनाचुरीको प्राङ्गानमा प्रतियोगिता आयोजना गरेको हो ।

मनहरी-६ को आयोजना तथा बाल हेल्पलाइन मकवानपुरको समन्वयमा प्रतियोगिता भएको हो । वडाध्यक्ष युवराज थपलियाको प्रमुख आतिथ्य तथा राष्ट्रिय माध्यमिक विद्यालयका व्यवस्थापन समितिका अध्यक्ष  शिवलाल मोक्तानको सभाध्यक्षमा प्रतियोगिता भएको हो ।

सगरमाथा आधारभूत विद्यालयबाट दुई समूह र राष्ट्रिय माविबाट सात समुह गरी ९ समुहले प्रतियोगितामा सहभागी  जनाएका थिए । जसमा राष्ट्रिय माविबाट सुष्मा प्रजा, अञ्जन विश्वकर्मा र प्रतीक्षा श्रेष्ठको समुह प्रथम हुन सफल भएका छन ।  यस्तै सगरमाथा आविबाट  उमेश मोक्तान, सुशीला जिम्बा र प्रशान्त थिङको समुह द्वितीय भएका छन । त्यसैगरी राष्ट्रिय माविबाट निर्माण गरिएको समुह नै  तृतीय र सान्त्वना हुन सफल भएको छ ।

क्रमश: उत्सव थिङ, सिता माया तितुङ र अप्सरा प्रजा तृतीय र विवेक मुक्तान, कर्म रुम्बा र कृसन मुक्तानको समुह सान्त्वना हुन सफल भएको मनहरी गाउँपालिका स्तरीय बाल अधिकार समितिका सदस्य आशिष बुढाथोकीले जानकारी दिनुभयो । कार्यक्रममा विद्यालयका प्रधानाध्यापक सुर्यबहादुर मोक्तान, बाल हेल्पलाइनका  सहजकर्ता मिनराज घलान लगायतको उपस्थिति थियो ।