हेटौँडाको हुप्राचौर ‘नमुना खुल्ला चौर’ बन्ने तयारीमा, ३ करोड बजेटसहित मास्टर प्लान अन्तिम चरणमा

हेटौंडा,चैत २५ गते । बाग्मती प्रदेशको राजधानी हेटौँडा उपमहानगरपालिका–४ स्थित लोकतान्त्रिक चौर (हुप्राचौर) लाई सुविधा सम्पन्न तथा आकर्षक नमुना खुल्ला चौरका रूपमा विकास गरिने भएको छ। करिब ३ करोड रुपैयाँ बजेट व्यवस्थापन गर्दै चौरलाई प्रदेशकै उत्कृष्ट सार्वजनिक स्थल बनाउने लक्ष्यसहित योजना अघि बढाइएको हो।

हेटौँडा उपमहानगरपालिकाकी नगर प्रमुख मिना कुमारी लामाका अनुसार ‘महिला मैत्री सहर निर्माण परियोजना’ अन्तर्गत चौरको मास्टर प्लान तयार गर्ने काम अन्तिम चरणमा पुगेको छ। मास्टर प्लान तयार भएसँगै निर्माण कार्यका लागि छिट्टै बोलपत्र आह्वान गरिने उनले बताइन्। परियोजनाका साथै अन्य स्रोतबाट पनि आवश्यक बजेट व्यवस्थापन गरिने जनाइएको छ।

त्यसैगरी वडा नं. ४ का अध्यक्ष नवीन सिग्देलले चौरलाई बहु-उपयोगी र व्यवस्थित खेल तथा मनोरञ्जन क्षेत्रका रूपमा विकास गरिने जानकारी दिए। उनका अनुसार फुटबल, भलिबल र क्रिकेट खेल मैदानलाई थप स्तरीय बनाइनेछ भने खुल्ला जिमको मर्मत तथा विस्तार गरिनेछ। साथै बालबालिकाका लागि खेल क्षेत्र, जेष्ठ नागरिकका लागि विश्राम स्थल, बस्ने तथा आराम गर्ने स्थान, आकर्षक प्रवेशद्वार र मञ्च निर्माण गरिने योजना रहेको छ।

यसअघि चौरमा सार्वजनिक शौचालय, हिँड्ने ट्र्याक र भलिबल कोर्ट निर्माण भइसकेको छ भने क्रिकेट केज निर्माणको काम जारी रहेको छ। वडा कार्यालयको व्यवस्थापनमा नियमित सरसफाइ तथा मर्मत सम्भार हुँदै आएको चौरमा हालै ४ वटा हाईमास्ट बत्ती जडान गरिएपछि रातको समयमा समेत उज्यालो वातावरण बनेको छ।

वडा अध्यक्ष सिग्देलका अनुसार चौरलाई महिला, बालबालिका, अपाङ्गता भएका व्यक्ति तथा खेल प्रेमी सबैका लागि मैत्रीपूर्ण बनाउने उद्देश्य सहित योजना अघि बढाइएको छ।