जसपा नेपालद्वारा जेन जी आन्दोलन सफल भएको घोषणा, अन्तरिम सरकार गठनको माग

ललितपुर, भदौ २५ गते । जनता समाजवादी पार्टी (जसपा) नेपाल केन्द्रीय कार्यालय बालकुमारी ललितपुरले जारी गरेको विज्ञप्तिमा नेपालकै इतिहासमा पहिलोपटक जेन जी पुस्ताद्वारा सञ्चालन गरिएको सुशासन, भ्रष्टाचार नियन्त्रण, न्याय र परिवर्तनका लागि भएको आन्दोलन विजयका साथ सफल भएको घोषणा गरेको छ।

जसपा नेपालले आन्दोलनमा सहभागी युवापुस्तालाई हार्दिक बधाई दिँदै सहादत प्राप्त युवाप्रति श्रद्धाञ्जली अर्पण गरेको छ भने शहीद परिवारप्रति गहिरो समवेदना व्यक्त गरेको छ। विज्ञप्तिमा घाइतेहरूलाई शीघ्र स्वास्थ्यलाभको शुभकामना समेत व्यक्त गरिएको छ।

आन्दोलनका क्रममा जनधनको अपूरणीय क्षति भएको उल्लेख गर्दै पार्टीले थप दुर्घटना र क्षति हुन नदिन सबैलाई सचेत र जिम्मेवार बन्न आग्रह गरेको छ। साथै, विगतका संघर्ष र बलिदानबाट प्राप्त लोकतन्त्र, गणतन्त्र, संघीयता, समावेशिता, सामाजिक न्याय, नागरिक स्वतन्त्रता र मौलिक हक जस्ता ऐतिहासिक उपलब्धिहरूलाई सुरक्षित गर्दै अझै नयाँ उपलब्धिहरू हासिल गर्न निरन्तर प्रयास गर्नुपर्नेमा जोड दिएको छ।

विज्ञप्तिमा कुनै पनि प्रकारको अतिवादी वा प्रतिगमनकारी गतिविधि हुन नदिन सबै पक्षलाई सचेत गराइएको छ। साथै, आन्दोलनरत परिवर्तनकारी युवालाई समेट्दै तत्काल अन्तरिम सरकार गठन गरी मुलुकलाई सहज निकास दिनुपर्नेमा जोड दिइएको छ।

जसपा नेपालले संयमता, धैर्यता, वार्ता र संवादमार्फत शान्ति, कानुन व्यवस्था, सहिष्णुता र अमनचयन कायम गर्न सबै पक्षलाई सक्रिय सहयोग गर्न हार्दिक अपिल गरेको छ।