भुटनदेवी मावि अन्तर्राष्ट्रिय गुणस्तरमा उक्लने तयारीमा, आईएसओ प्रमाणीकरणका लागि सम्झौता

हेटौँडा, चैत ८ गते । हेटौँडा–४ स्थित भुटनदेवी माध्यमिक विद्यालयले आफ्नो भौतिक संरचना र शैक्षिक गुणस्तरलाई अन्तर्राष्ट्रिय स्तरमा उक्लाउने अभियान सुरु गरेको छ। यसका लागि विद्यालयले ग्लोबल क्वालिटी काउन्सिल, नेपालसँग आईएसओ प्रमाणीकरणतर्फ अघि बढ्ने सम्झौता गरेको छ।

आइतबार आयोजित कार्यक्रममा विद्यालय व्यवस्थापन समितिका अध्यक्ष नवीन सिग्देल, प्रधानाध्यापक सूर्यप्रसाद घिमिरे तथा काउन्सिलका प्रतिनिधि सुदीप शर्माले सम्झौतापत्रमा हस्ताक्षर गरेका हुन्।

सम्झौतापछि विद्यालय व्यवस्थापन समिति, शिक्षक, अभिभावक संघ तथा विद्यालय अनुगमन समितिका सदस्यहरूलाई अन्तर्राष्ट्रिय गुणस्तर मापदण्ड र सूचकबारे अभिमुखीकरण कार्यक्रम समेत सञ्चालन गरिएको विद्यालयले जनाएको छ।

प्रधानाध्यापक घिमिरेका अनुसार विद्यालयलाई अन्तर्राष्ट्रिय स्तरको शैक्षिक संस्थामा रूपान्तरण गर्ने लक्ष्यसहित विभिन्न चरणका कार्यक्रम अघि बढाइएको छ।

विद्यालय व्यवस्थापन समितिका अध्यक्ष सिग्देलले आगामी २०८३ साल चैत मसान्तभित्र आईएसओ प्रमाणीकरण हासिल गर्ने लक्ष्य लिइएको जानकारी दिँदै भौतिक पूर्वाधार र शैक्षिक वातावरणलाई गुणस्तरीय बनाउने प्रतिबद्धता व्यक्त गरे।

ग्लोबल क्वालिटी काउन्सिल, नेपालका प्रतिनिधि सुदीप शर्माका अनुसार विद्यालयको प्रारम्भिक अवस्था अध्ययन गरी आगामी तीन वर्षका लागि शैक्षिक गुणस्तर सुधार ढाँचा तयार पारिएको छ। उनले मकवानपुर जिल्लाकै पहिलो अन्तर्राष्ट्रिय गुणस्तर प्रमाणित सामुदायिक विद्यालयका रूपमा भुटनदेवी मावि स्थापित हुने विश्वास व्यक्त गरे।

यसअघि विभिन्न चरणमा विद्यालय व्यवस्थापन समिति, शिक्षक तथा अभिभावक संघ, विद्यालय अनुगमन समिति र स्थानीय सरोकारवालाबीच छलफल तथा अन्तरक्रिया कार्यक्रम सम्पन्न भएपछि आईएसओ प्रमाणीकरणमा जाने निर्णय गरिएको सह–प्रधानाध्यापक तथा विद्यालय आईएसओ संयोजक वेदराज कोइरालाले जानकारी दिए।