इन्द्रसरोवर गाउँपालिकामा सामाजिक सुरक्षा भत्ता वितरणका लागि वडा–वडामा शिविर सञ्चालन

इन्द्रसरोवर गाउँपालिका, चैत २२ गते । इन्द्रसरोवर गाउँपालिकाले आर्थिक वर्ष २०८२/८३ को तेस्रो त्रैमासिक किस्ताअन्तर्गत सामाजिक सुरक्षा भत्ता वितरणका लागि वडा–वडामा भुक्तानी शिविर सञ्चालन गर्ने भएको छ। गाउँ कार्यपालिकाको कार्यालय अन्तर्गत सामाजिक सुरक्षा तथा पञ्जीकरण शाखाले जारी गरेको सूचनाअनुसार लाभग्राहीहरूको खातामा (EFT) प्रणालीमार्फत रकम जम्मा भइरहेको जनाएको छ।

गाउँपालिका र ग्लोबल आईएमई बैंक लिमिटेड, इन्द्रसरोवर शाखाको समन्वयमा सञ्चालन हुने उक्त शिविर मार्फत लाभग्राहीहरूलाई आफ्नै वडामा पुगेर भत्ता वितरण गरिने व्यवस्था मिलाइएको छ। सम्बन्धित लाभग्राहीहरूलाई तोकिएको मिति, समय र स्थानमा उपस्थित भई भत्ता बुझ्न आग्रह गरिएको छ।

सूचना अनुसार चैत २४ गते वडा नं. ५ (डौठेखोला), चैत २५ गते वडा नं. ४ (फाखेल), चैत २६ गते वडा नं. १ (मार्खु), चैत २७ गते वडा नं. ३ (सिस्नेरी) र वैशाख २ गते वडा नं. २ (कुलेखानी, भालुखर्क) मा भुक्तानी शिविर सञ्चालन गरिनेछ। सबै शिविर बिहान ९ बजेदेखि दिउँसो २ बजेसम्म सञ्चालन हुने जनाइएको छ।

गाउँपालिकाले भत्ता बुझ्न जाँदा चेक, नागरिकताको प्रमाणपत्रको प्रतिलिपि र सामाजिक सुरक्षा परिचयपत्र अनिवार्य रूपमा साथमा ल्याउन अनुरोध गरेको छ। साथै नयाँ लाभग्राहीहरूले बैंक खाता सक्रिय गराई आवश्यक कागजातसहित उपस्थित हुनुपर्ने व्यवस्था गरिएको छ।

नयाँ लाभग्राहीका लागि नागरिकताको प्रतिलिपि, बालबालिकाको हकमा जन्मदर्ता, सामाजिक सुरक्षा परिचयपत्र, राष्ट्रिय परिचयपत्र नम्बर, पासपोर्ट साइज फोटो, अपाङ्गता परिचयपत्र (आवश्यक भएमा) लगायत कागजात आवश्यक पर्नेछन्। अत्यन्त अशक्त, ज्येष्ठ नागरिक तथा अपाङ्गता भएका लाभग्राहीका हकमा संरक्षक मार्फत भत्ता बुझ्न सकिने व्यवस्था समेत गरिएको छ।

थप जानकारीका लागि सामाजिक सुरक्षा तथा पञ्जीकरण शाखाका सम्पर्क नम्बर ९८४७२१६००५ र ९८६६३३९९६६ मा सम्पर्क गर्न सकिने जनाइएको छ।

हेर्नुहोस् सूचना –