हेटौंडा–काठमाडौँ सुरुङ्ग मार्गमा ३१ करोडभन्दा बढी ठगी आरोप : मन्त्री समक्ष औपचारिक ध्यानाकर्षण

हेटौंडा, चैत २३ गते । हेटौंडा–काठमाडौँ सुरुङ्ग मार्ग निर्माणको नाममा सर्वसाधारणबाट संकलन गरिएको करोडौँ रकम ठगी भएको भन्ने गुनासो सम्बन्धमा भौतिक पूर्वाधार तथा यातायात मन्त्रालयमा औपचारिक ध्यानाकर्षण गराइएको छ।

सामाजिक अभियान्ता विशालराज महतले आफ्नो सामाजिक सञ्जाल फेसबुक मार्फत जानकारी दिँदै नेपाल पूर्वाधार विकास कम्पनीले सेयर मार्फत संकलन गरेको करिब ३१ करोड ७६ लाख रुपैयाँ काम नै नगरी हिनामिना भएको आरोपबारे माननीय मन्त्रीसमक्ष ध्यानाकर्षण गराइएको बताएका छन्।

उनका अनुसार उक्त ध्यानाकर्षण पत्र मन्त्रालयको सचिवालयमा दर्ता भइसकेको छ र आवश्यक प्रक्रिया पूरा गर्दै कार्यान्वयन तहमा पुगेको जानकारी समेत दिइएको छ।

महतले सर्वसाधारणले गाई–बाख्रा बेचेर, जग्गा बेचेर जुटाएको पसिनाको पैसा सुरक्षित गर्नु राज्यको दायित्व भएको स्पष्ट पारेका छन्। उनले यस विषयलाई सरकारले गम्भीरतापूर्वक लिएर छानबिन गर्नुपर्ने, दोषीमाथि कडा कारबाही गर्नुपर्ने र पीडितलाई न्याय दिलाउनुपर्ने माग गरेका छन्।

यसैबीच उनले सम्पूर्ण सरोकारवालालाई केही समय धैर्य गर्न अपिल गर्दै आफूहरू निरन्तर पहल र दबाबमा रहने बताएका छन्।

यस्तो छ ध्यानाकर्षण पत्र हेर्नुहोस्।