वर्षाका कारण मधेश प्रदेशका १५५ घरधुरी डुबानमा

गत सोमबारदेखि परेको वर्षाका कारण मधेश प्रदेशका १५५ घरधुरी डुबानमा परेको छ। मधेश प्रदेश प्रहरी कार्यालय, जनकपुरका प्रवक्ता प्रहरी उपरीक्षक महेन्द्रकुमार श्रेष्ठका अनुसार पर्सामा २०, रौतहटमा ७५ र महोत्तरीमा ६० वटा घरधुरी डुबानमा परेको छ।

पर्साको वीरगञ्ज महानगरपालिका-११ स्थित डोम बस्ती, रौतहटको फतुवाविजयपुर नगरपालिका-८ बुनियाँद गाँउ डुबानमा परेको छ।रौतहटकै दुर्गाभगवती गाउँपालिका-५ बडहर्वा टोलमा बागमती खोलाको बहाव बढन गई बस्तीमा पानी पसेको छ।

महोत्तरीको लोहारपट्टी नगरपालिका-५ डठौरा गाउँ र बलवा नगरपालिका-११ भगवतीपुरमा रातु खोलामा पानीको बहाव बढ्न गई खोला रोक्नको लागि लगाइएको तटबन्ध १२ मिटर भत्किएको छ। तटबन्ध भत्किंदा बस्तीमा पानी पसेको प्रवक्ता श्रेष्ठले जानकारी दिए ।