आईसीसी विश्वकप क्रिकेटमा पपुवा न्युगिनी ५२ रनले नेपालसित हारे

नेपालले आईसीसी विश्वकप क्रिकेट लिग टू अन्तर्गत अन्तिम त्रिकोणात्मक शृखंलाको पहिलो खेलमा पपुवा न्युगिनी (पीएनजी) लाई ५२ रनले हराएकाे छ । बिहीबार कीर्तिपुरमा नेपालले दिएको २९८ रनको लक्ष्य पछ्याएको पीएनजीलाई ४७ ओभर १ बलमा २४५ रनमा अलआउट गर्दै नेपालले फराकिलो जित हात पारेको हो । पीएनजीलाई अलआउट गर्न नेपालका सन्दीप लामिछानेले ४, दीपेन्द्रसिंह ऐरीले २ र कुशल मल्लले १ विकेट लिनुभयो ।

पीएनजीका नोर्मन भानुले सर्वाधिक ६० र टोनी उराले ५० रन बनाउनुभयो । जितपछि ३३ खेलबाट ३४ अंक जोडेको नेपाल तालिकाको पाँचौ स्थानमा छ । नेपाललाई अब ओडीआई मान्यता बचाइ राख्न अब एक जित आवश्यक छ । शृंखलाका बाँकी तीन खेल जितेमा शीर्ष तीनमा पुग्दै नेपाल विश्वकप छनोट खेल्न पाउने छ । नेपालले अब पीएनजीसँग एक र यूएईसँग दुई खेल खेल्न बाँकी छ ।

टस हारेर पहिले ब्याटिङ गरेको नेपालले आसिफ सेखको ११० रनको मद्दतमा २९७ रन बनाएको थियो । यो नेपालले एकदिवसीय अन्तराष्ट्रियमा बनाएको अहिलेसम्मकै धेरै रन हो । आजको खेलसँगै आसिफ एकदिवसीय अन्तरराष्ट्रियमा १ हजार रन पूरा गर्ने दोस्रो नेपाली खेलाडी पनि बन्नु भएको छ । यसअघि रोहित पाैडेलले मात्र एकदिवसीय अन्तरराष्ट्रियमा एक हजार रन पूरा गर्नुभएको छ ।