फेरि अमेरिकामा आँधीले ठूलो विनाश ल्यायो,मानिसको मृत्यु हुनेको सङ्ख्या २२ पुग्यो

फेरि अमेरिकामा आँधीले ठूलो विनाश ल्याएको छ । शुक्रबार र शनिबार आएको आँधीका कारण दक्षिण–मध्य र पूर्वी अमेरिकामा मृत्यु हुनेको सङ्ख्या २२ पुगेको अन्तराष्ट्रिय सञ्चारमाध्यमहरूले जनाएका छन् । आँधीका कारण सयभन्दा बढी घाइते भएको बताइएको छ ।

टेनेसीको आपतकालीन व्यवस्थापन एजेन्सीका प्रवक्ताले एएफपीलाई आँधीबाट सात जनाको मृत्यु भएको पुष्टि गरेका छन्। यसबाहेक, दक्षिणमा अर्कान्सास, मिसिसिपी र अलाबामा र मध्यपश्चिमको इन्डियाना र इलिनोइसमा कम्तिमा १५ जनाको मृत्यु भएको छ। राज्यका गभर्नरले शुक्रबारको आँधीपछि पनि धेरै आँधी आएको बताएका छन् । यसले धेरै विनाश निम्त्याएको छ ।

ठूलो संख्यामा मानिसका घरमा क्षति पुगेको छ । बिजुलीका तारहरू काटिएका छन्। रुखहरु लडेका थिए भने गाडीहरु पल्टिएका थिए । राज्यका गर्भनरले आपतकालिन अवस्थाको घोषणा गर्दै राहत र उद्धारका प्रयासहरूमा मद्दत गर्न नेसनल गार्डलाई सक्रिय बनाएका छन् । गर्भनरले यस विषयमा राष्ट्रपति जो बाइडेनसँग पनि कुराकानी गरेको बताएका छन् ।

मेयर जेनिफर हब्सले सीएनएनलाई बताए अनुशार उत्तरपूर्वी अर्कान्सासको वेन सहर, “आँधीले पूर्वदेखि पश्चिमसम्म आधा भाग काटेको छ।“ यातायात पूर्ण रूपमा प्रभावित भएको छ। राष्ट्रिय मौसम सेवाले अन्य धेरै राज्यहरूमा पनि आँधीको चेतावनी जारी गरेको छ।

आँधीकोे चेतावनी उत्तरको आयोवादेखि दक्षिणी राज्य मिसिसिपीसम्मको स्थानमा थियो, जहाँ गत हप्ता आएको आँधीले २५ जनाको ज्यान गएको थियो । हावाहुरी र विनाशका कारण छ लाखभन्दा बढी घरमा विद्युत् अवरुद्ध भएको छ । धेरै ठाउँमा बिजुलीका पोल ढलेका छन् । जसका कारण पूरै व्यवस्था नै अस्तब्यस्त बनेको छ ।