मकवानपुरमा सुकुम्बासीबारे फैलिएका हल्ला निराधार: सांसद प्रशान्त उप्रेती

हेटौडा,बैशाख १७ गते । प्रतिनिधि सभा सदस्य प्रशान्त उप्रेतीले काठमाडौँमा हालै सुकुम्बासी बस्ती खाली गराइएपछि मकवानपुर क्षेत्रमा फैलिएका भ्रम र अफवाह प्रति गम्भीर ध्यानाकर्षण भएको बताएका छन्।

सामाजिक सञ्जाल मार्फत आफ्नो धारणा सार्वजनिक गर्दै उनले काठमाडौँको अवस्था र मकवानपुरको परिस्थिति पूर्ण रूपमा फरक रहेको स्पष्ट पारे। “सरकार कसैलाई पनि घरबारविहीन बनाउने पक्षमा छैन,” उनले उल्लेख गर्दै जनताको गास, बास र कपास जस्ता आधारभूत आवश्यकता प्रति सरकार पूर्ण रूपमा प्रतिबद्ध रहेको बताए।

उनले स्थानीय बासिन्दालाई ढुक्क हुन आग्रह गर्दै आफ्नो क्षेत्रका नागरिकको हक र हितको पक्षमा सधैं दृढता पूर्वक उभिने प्रतिबद्धता व्यक्त गरे। साथै, आधिकारिक सूचना बाहेक अन्य कुनै पनि हल्ला, भ्रम वा त्रासमा नपर्न सबैमा अनुरोध गरेका छन्।

उनका अनुसार पछिल्लो समय फैलिएका अफवाहहरूले स्थानीय जनतामा अनावश्यक त्रास सिर्जना गरिरहेको भन्दै उनले संयमित रहन र सत्यतथ्यमा आधारित सूचना मात्र विश्वास गर्न आग्रह गरेका छन्।