मकवानपुरमा सुकुम्बासी आन्दोलनलाई सात दलको ऐक्यबद्धता, सरकारलाई दमन नगर्न चेतावनी

हेटौडा,बैशाख २० गते । मकवानपुर जिल्लामा भूमिहीन सुकुम्बासी तथा अव्यवस्थित बसोबासी जनताको आन्दोलनप्रति सात राजनीतिक दलले ऐक्यबद्धता जनाएका छन्। संयुक्त विज्ञप्ति जारी गर्दै उनीहरूले सरकारलाई बल प्रयोग गरेर घर टहरा भत्काउने तथा हटाउने कार्य नगर्न ध्यानाकर्षण गराएका छन्।

विज्ञप्तिमा सुरक्षाशक्तिको प्रयोग मार्फत राज्यले दमनकारी शैली अपनाएको आरोप लगाउँदै जनताको बसोबास खोसिने अवस्थाले मानवीय संकट निम्तिएको उल्लेख गरिएको छ। आफ्नो आश्रय गुमाउँदा केही नागरिक आत्महत्यासम्मको अवस्थामा पुगेको घटनालाई अत्यन्त दुःखद र दुर्भाग्यपूर्ण रूपमा चित्रण गरिएको छ।

वास्तविक भूमिहीन सुकुम्बासी तथा अव्यवस्थित बसोबासीको पहिचानका लागि निष्पक्ष छानबिन आवश्यक रहेको जनाउँदै त्यसको तथ्य सार्वजनिक गर्न माग गरिएको छ। साथै, उनीहरूलाई लालपुर्जा उपलब्ध गराउने सुनिश्चितता गर्नुपर्नेमा जोड दिइएको छ।

दीर्घकालीन र वैकल्पिक व्यवस्थापनबिना जबर्जस्ती हटाउने कदमले समस्या झन् जटिल बन्ने चेतावनी दिँदै सरकारले संवेदनशील र जिम्मेवार ढंगले अघि बढ्नुपर्ने उल्लेख गरिएको छ।

उक्त आन्दोलनमा सातै दलका तर्फबाट सक्रिय सहभागिता र ऐक्यबद्धता रहने जनाइएको छ। विज्ञप्तिमा विभिन्न दलका जिल्ला तहका नेताहरूले संयुक्त रूपमा हस्ताक्षर गरेका छन्।