सीता माविमा एकैदिन ११ जना छात्रा बिरामी

मनहरी । मनहरी गाउँपालिका वडा नम्बर २ भुन्द्रुङटाँडी स्थित श्री सीता माध्यमिक विद्यालयमा एकै दिन ११ जना छात्रा बिरामी भएका छन् । केही दिन अघिदेखी कक्षा ८ मा पढ्ने छात्रा सुशिला थिङ पटकपटक बिरामी भइरहेकी थिइन् ।

मंगलबार भने कक्षा ८, ७ र ५ मा पढ्ने छात्राहरु पनि बिरामी भएका हुन् । बिरामीका अनुसार सुरुमा हातखुट्टा समाएर आउने र पछि केही थाहा नपाउने अनि बेथाले छोडेपछी हातखुट्टा र ज्यान दुखेको महसुस मात्र हुने बताउँछन् ।

छात्राहरु बिरामी हुन थालेपछी एक्कासि रुने, कराउने, चिच्याउने र बरबराउने गर्छन् । बरबराउन थालेपछी उठेर हिँड्न खोज्ने, मान्छेले समात्यो भने नसमात्नु, मलाई छोडिदेऊ, मलाई साथिले बोलाइराछ, म जान्छु भन्छन् भने कहिले मलाई भूतले तानिराछ, घाँटी निचरिराछ भन्छन् ।

यस्तो हुनुको कारण अहिलेसम्म पत्ता लगाउन सकिरहेको छैन । कसैले डरको कारण मानसिक असन्तुलन भइ त्यस्तो हुने बताउछन् त कोहि भूतप्रेतको कारण त्यस्तो भएको होला भन्ने आँकलन गरिरहेका छन् । अखिर के भएर छात्राहरु बिरामी भएका हुन् ? छात्रलाई किन त्यस प्रकारको बिरामी भएको छैन ? यो विषयमा सम्बन्धित सबैको ध्यान जान जरुरी छ ।

यदि विद्यालयमा सधैं यस्तो भैरहने हो भने विद्यार्थीहरु न विद्यालय आउन मान्छन् न त विद्यार्थीको ध्यान पढाइतिर जान्छ । शिक्षक तथा कर्मचारीको पनि आफ्नो काममा ध्यान नजान सक्छ । जसले गर्दा विद्यालयको पढाईको गुणस्तर खस्किन सक्छ ।