रौतहटमा ‘प्रेस’ लेखिएका सवारी साधनमा प्रतिबन्ध

रौतहट, भदौ १६ गते । नेपाल पत्रकार महासंघ रौतहट शाखाले सोमबार जारी गरेको सूचनामा जिल्लाभर ‘प्रेस’ लेखिएका सवारी साधनलाई तत्काल हटाउन निर्देशन दिएको छ।

सूचनामा भनिएको छ, “संचारमाध्यमको हकमा सवारी साधन कुनै मिडिया हाउसको नाममा खरिद भएको भएमा सम्बन्धित सोही मिडिया हाउसको नाम उल्लेख गर्न सकिने छ। आपतकालीन समय, कर्फ्यू वा अन्य सवारी आवागमनमा प्रतिबन्ध भएको अवस्थामा बाहेक अन्य अवस्थामा ‘प्रेस’ लेखी सवारी साधन प्रयोग नगर्न सबैलाई अनुरोध गर्दछौं।”

महासंघले ‘प्रेस’ लेखिएका सवारी साधनको दुरुपयोग बढेको भन्दै सो शब्द मेट्न जिल्ला ट्राफिक कार्यालय र जिल्ला प्रहरी कार्यालयलाई पत्राचार गर्ने निर्णय समेत भएको जानकारी दिएको छ। साथै ‘प्रेस’ लेखिएका सवारी साधनको गहन छानबिन तथा चेकजाँच गर्न सम्बन्धित प्रशासनलाई आग्रह गरिएको सूचनामा उल्लेख छ।