मन्त्रिपरिषद् निर्णय: ५२ मिलियन डलर ऋण स्वीकारदेखि मल खरिद र गुरुयोजना स्वीकृतसम्म

काठमाडौं,बैशाख २१ गते । आज बसेको मन्त्रिपरिषद् बैठकले विभिन्न चार महत्वपूर्ण निर्णयहरू गरेको छ, जसअन्तर्गत आर्थिक, कृषि, पूर्वाधार तथा संवैधानिक विषय समेटिएका छन्।

बैठकले परम्परागत बोइलरलाई इलेक्ट्रोनिक बोइलरबाट प्रतिस्थापन गर्न उद्योगहरूलाई कर्जा उपलब्ध गराउने तथा वायु गुणस्तर मापन क्षमता अभिवृद्धि गर्ने उद्देश्यले विश्व बैंकबाट प्राप्त हुने ५२ मिलियन अमेरिकी डलर बराबरको सहुलियतपूर्ण ऋण र ५ मिलियन अमेरिकी डलर बराबरको अनुदान स्वीकार गर्ने निर्णय गरेको छ।

यस्तै, भारत सरकारसँग सरकार–सरकार (G2G) माध्यमबाट ६० हजार मेट्रिक टन युरिया र २० हजार मेट्रिक टन डीएपी मल खरिद गर्न कृषि सामग्री कम्पनी लिमिटेडलाई सैद्धान्तिक स्वीकृति प्रदान गरिएको छ। यस निर्णयले कृषि उत्पादन वृद्धि र मल आपूर्ति सहज बनाउन सहयोग पुग्ने अपेक्षा गरिएको छ।

त्यसैगरी, बैठकले संसद भवन परिसरमा प्रदेश संरचनालगायतका विषय समेटिएको सिंहदरबार परिसरको परिमार्जित गुरुयोजना स्वीकृत गर्ने निर्णय गरेको छ।

संवैधानिक विषयतर्फ, संवैधानिक परिषद् (पहिलो संशोधन) अध्यादेश, २०८३ राष्ट्रपति द्वारा पुनर्विचारका लागि फिर्ता गरिएको सन्दर्भमा उक्त अध्यादेश पुनः जारी गर्न सिफारिस गर्ने निर्णय पनि मन्त्रिपरिषद्ले गरेको छ।

सरकारका यी निर्णयहरूलाई आर्थिक सुधार, कृषि आपूर्ति व्यवस्थापन, प्रशासनिक पूर्वाधार विकास र संवैधानिक प्रक्रियासँग सम्बन्धित महत्वपूर्ण कदमका रूपमा हेरिएको छ।