पत्रकार वसन्त लामामाथि आक्रमण, नेपाल पत्रकार महासंघद्वारा दोषीलाई कारबाही गर्न माग

काठमाडौं, भदौ ३१ गते । तराई पोस्टका पत्रकार वसन्त लामामाथि भएको आक्रमणप्रति नेपाल पत्रकार महासंघले गम्भीर ध्यानाकर्षण जनाएको छ।

सोमबार बिहान बाराको निजगढ नगरपालिका–१ स्थित बनस्थली हाट बजार नजिकै मोटरसाइकलमा आएका एक समूहले पत्रकार लामामाथि कुटपिट गर्दा शरीरका विभिन्न भागमा चोटपटक पुगेको महासंघले जनाएको छ।

महासंघले लामाको शीघ्र स्वास्थ्यलाभको कामना गर्दै घटनाप्रति गहिरो चिन्ता व्यक्त गरेको छ। विज्ञप्तिमा भनिएको छ, “आन्दोलनको क्रममा काट तस्करी बढेको आशयको समाचार प्रकाशन गरेको विषयलाई लिएर आक्रमण भएको भन्ने आशंका गरिएको छ।”

समाचारप्रतिको असहमति विभिन्न माध्यमबाट व्यक्त गर्न सकिने भए पनि पत्रकारमाथि भएको आक्रमण प्रेस स्वतन्त्रतामाथि ठाडो उल्लंघन भएको महासंघले स्पष्ट पारेको छ। महासंघले घटनाको सत्यतथ्य छानबिन गरी दोषीलाई हदैसम्मको कारबाही गर्न सम्बन्धित निकायलाई आग्रह गरेको छ।