जसपा नेपालका उपाध्यक्ष बज्राचार्य : “जेन जि आन्दोलन सहिदहरूलाई श्रद्धाञ्जली, भ्रष्ट सरकारको असंवेदनशीलताले देश संकटमा”

ललितपुर, अशोज ४ । जनता समाजवादी पार्टी नेपाल (जसपा) को समाजवादी विद्यार्थी युनियन नेपालद्वारा जेन जि आन्दोलनका क्रममा सहादत प्राप्त गरेका वीर सहिदहरूलाई श्रद्धाञ्जली कार्यक्रम सम्पन्न भएको छ। ललितपुरस्थित पार्टी केन्द्रीय कार्यालयमा आयोजित कार्यक्रममा सहादत प्राप्त सहिदहरूको सम्झनामा मैनबत्ती बालेर श्रद्धाञ्जली अर्पण गरिएको हो।

कार्यक्रममा जसपा नेपालका केन्द्रीय उपाध्यक्ष विद्युत बज्राचार्यले आन्दोलनका क्रममा ज्यान गुमाएका वीर युवाप्रति हार्दिक श्रद्धाञ्जली अर्पण गर्दै शोकाकुल परिवारजनप्रति गहिरो समवेदना व्यक्त गरेका छन् । साथै, आन्दोलनमा घाइते भएका सबै युवाहरूको शीघ्र स्वास्थ्यलाभको कामना गर्दै उनले यो आन्दोलन कुनै आकस्मिक घटना नभई भ्रष्ट सरकारविरुद्ध युवाले चलाएको चेतनायुक्त अभियान भएको उल्लेख गरेका छन् ।

उनले भने, “संघीय लोकतान्त्रिक गणतन्त्रको घोषणा भइसके पनि व्यवस्था जनताले पाएका तर अवस्था भने सुधार हुन सकेको छैन। भ्रष्टाचार, नातावाद र कृपावादले राज्यलाई उल्टो दिशातर्फ मोडिदिँदा यो आवाज बाहिर आएको हो।”

बज्राचार्यले जारी संविधानमा संशोधन आवश्यक भएको र यसबारे पार्टीले पटक–पटक आवाज उठाउँदा पनि विद्यमान सरकारले बेवास्ता गरेको आरोप लगाएका छन् । उनले हालैको घटनामा सरकारद्वारा विद्यार्थीहरूको शान्तिपूर्ण आन्दोलनलाई गोली प्रहार गरेर दमन गरिएको स्मरण गर्दै भने, “१९ जना विद्यार्थीले ज्यान गुमाउनुपर्‍यो, सयौँ घाइते भए, अस्पतालसम्म पुगेका युवाहरू समेत सुरक्षित भएनन्। यस्तो दृश्यले यो सरकार निरंकुश भएको प्रमाणित गरेको छ।”

उनले नेपाली कांग्रेस र एमालेको संयुक्त सरकारलाई समर्थन गर्दा सुधारको अपेक्षा गरिएको तर धैर्यताको अवधि सकिँदा पनि देशलाई समृद्ध बनाउन कुनै ठोस काम नभएको जिकिर समेत गरे्का छन् । “समाजको सुधार र युवाको भविष्य सुरक्षित गर्ने ठाउँमा सरकार उल्टै सामाजिक सञ्जाल समेत बन्द गर्ने निरंकुश चेष्टा गर्न थालेको छ, जसले देशलाई अझ संकटतर्फ धकेलेको छ,” उनले जोड दिए।

कार्यक्रममा विद्यार्थी नेताहरूले जेन जि आन्दोलनका मागलाई जसपा नेपालले पनि आफ्नो मुद्दासँग समानान्तर ठानेर समर्थन गर्ने बताएका थिए।

बज्राचार्यले अन्त्यमा भने, “यो जेन जि मात्र होइन, सिङ्गो देशका सचेत नागरिकको आवाज हो। हाम्रो पार्टी यस मुद्दालाई अझ बुलन्द बनाउन अग्रसर हुनेछ, सबै विद्यार्थी, युवा र न्यायप्रेमी नागरिकलाई गोलबद्ध हुन आह्वान गर्दछौं।”