धरान मेयर हर्क साम्पाङले दर्ता गरे राष्ट्रिय श्रम संस्कृति पार्टी, झण्डा नबनाउने घोषणा

धरान, अशोज १३ गते । धरान उपमहानगरपालिकाका मेयर हर्क साम्पाङले निर्वाचन आयोगमा राष्ट्रिय श्रम संस्कृति पार्टी दर्ता गर्न निवेदन दिएका छन् । पार्टी दर्तापछि उनले आफ्नो दलको छुट्टै झण्डा नबनाउने घोषणा समेत गरेका छन्।

उनका अनुसार पार्टीको झण्डा नबनाउनुका पछाडि दुई प्रमुख कारण छन्। पहिलो, करोडौँ लुगा च्यातेर झण्डा बनाउनुभन्दा दुःखी र असहायलाई लुगा सिलाइ दिनु आवश्यक छ। दोस्रो, पार्टीको झण्डा बोकेर हिँड्दा राष्ट्रिय झण्डाको अस्तित्व ओझेलमा पर्ने भएकाले आफ्नै दलको झण्डा नबनाउने उनले स्पष्ट पारे।

साम्पाङले पार्टीमा आबद्ध हुने सदस्यहरूलाई पूर्ण स्वतन्त्र अभिव्यक्ति अधिकार रहने बताए। उनका अनुसार यस दलमा हुइप जारी गरिने छैन। “हुइप भन्नुको अर्थ नै कोर्रा हो, हाम्रो पार्टीमा कोही कसैलाई कोर्रा हानिँदैन,” साम्पाङले भने।

उनले पार्टी सदस्यता लिने सबैलाई ‘श्रमदाता’ का रूपमा पहिचान गरिने उल्लेख गरे। कार्यकर्ता भन्ने शब्द प्रयोग नगरी ‘श्रमदाता’ भन्नु नै यस दलको विशेषता रहेको उनले बताए। साथै, सदस्यता लिन चाहनेले माटो छुनुपर्ने अनिवार्य रहेको, माटोसँग अपनत्व नभएका व्यक्तिलाई सदस्यता नदिइने पनि उनले स्पष्ट पारे।

साम्पाङको भनाइमा नयाँ पार्टीको मुख्य उद्देश्य पुराना सोचले चलाइएका दलीय प्रवृत्तिलाई अन्त्य गर्दै देशका लागि कार्यकारी प्रधानमन्त्री चयन गर्ने हो। पार्टीमा स्वतन्त्र व्यक्तिले उम्मेदवारी दिन पाउने र विजयी भए कार्यकारी प्रमुख (प्रधानमन्त्री) बन्न सक्ने व्यवस्था रहने बताइएको छ।

उनले भने, “हाम्रो पार्टीको लक्ष्य पुराना दलहरूको गफ र भाषणबाजी होइन, श्रम र माटोसँग जोडिएका कार्यमार्फत देश परिवर्तन गर्नु हो।”