७०औं प्रहरी दिवसमा आईजीपी खापुङको सन्देश : ‘नागरिक सुरक्षामा कुनै पनि चुनौती सामना गर्न तयार छ नेपाल प्रहरी’

काठमाडौँ, अशोज ३१ गते । नेपाल प्रहरीका महानिरीक्षक (आईजीपी) चन्द्र कुबेर खापुङले ७०औं प्रहरी दिवस, २०८२ का अवसरमा संगठनका सकल दर्जाका प्रहरी कर्मचारी, पूर्व प्रहरी कर्मचारी, प्रहरी परिवार तथा अमर प्रहरीका परिवारजनप्रति शुभकामना व्यक्त गरेका छन्।

सन्देशमार्फत आईजीपी खापुङले प्रहरी दिवसको अवसरमा व्यक्तिगत तथा व्यावसायिक सफलता, पारिवारिक सुख–समृद्धि र उत्तरोत्तर प्रगतिको शुभकामना व्यक्त गर्दै संगठनका अमर तथा वीर प्रहरीप्रति हार्दिक श्रद्धाञ्जली अर्पण गरेका छन्।

उनले भाद्र २३ र २४ गतेका अप्रिय घटनापश्चात उत्पन्न कठिन परिस्थितिमा पनि प्रहरी संगठनले नागरिक सुरक्षाको जिम्मेवारी डटेर पूरा गर्नुपर्ने उल्लेख गर्दै कुनै घटनाबाट हतोत्साहित नहुन निर्देशन दिएका छन्।

आईजीपी खापुङले तोड़फोड़ र आगजनीबाट क्षतिग्रस्त भएका प्रहरी संरचनाको पुनर्निर्माणमा जनसहयोगका लागि नागरिकप्रति आभार व्यक्त गर्दै सो सहयोगले प्रहरीको मनोबल उच्च बनाएको बताए।

उनले थपे, “विगतका त्रुटिहरू सच्याउँदै असल अभ्यासलाई निरन्तरता दिई संगठनभित्रको भातृत्व भाव सुदृढ गर्दै कानुन कार्यान्वयनमा दृढ संकल्पसहित जिम्मेवारी निर्वाह गर्न सकल दर्जाका प्रहरी प्रतिबद्ध हुने विश्वास लिएको छु।”

सन्देशको अन्त्यमा आईजीपी खापुङले ७०औं प्रहरी दिवससँगै दिपावली, नेपाल संवत् र छठ पर्वको अवसरमा पनि हार्दिक मंगलमय शुभकामना व्यक्त गर्दै प्रहरी संगठनप्रति सबैलाई गौरवबोधका साथ योगदान दिन आह्वान गरेका छन्।