चितवन प्रशासनको आग्रह : नारायणघाट–मुग्लिन सडक खण्डमा अत्यावश्यक बाहेक यात्रा नगर्न अनुरोध

चितवन, कात्तिक १४ गते । जिल्ला प्रशासन कार्यालय चितवनले निरन्तर वर्षासँगै नारायणघाट–मुग्लिन सडक खण्डमा स–साना पहिरो खस्ने घटना भइरहेको भन्दै अत्यावश्यक बाहेक आज यात्रा नगर्न अनुरोध गरेको छ।

Suchana

कार्यालयले शुक्रबार जारी गरेको सूचनामा तुइनखोला लगायत पृथ्वीराजमार्ग अन्तर्गत मुग्लिन–मलेखु सडक खण्डका विभिन्न स्थानहरूमा हिजो साँझदेखि निरन्तर स–साना पहिरो खसिरहेको र ती पहिरो पन्छाउँदै सवारी आवागमन सुचारु गरिएको उल्लेख गरिएको छ।

तर वर्षा नरोकेका कारण पहिरोको जोखिम अझै बढ्न सक्ने सम्भावना रहेकोले सतर्क रहन र अत्यावश्यक नपरी यात्रा नगर्न अनुरोध गरिएको हो।

सूचनामा भनिएको छ, “वर्षा नरोकी पहिरोको जोखिम बढेको खण्डमा उक्त सडक खण्डमा सवारी आवागमन रोक्नुपर्ने परिस्थिति सिर्जना हुन सक्ने भएकाले सबैमा सावधानी अपनाउन हार्दिक अपिल गर्दछौं।”

यात्रा गर्नु अघि अवस्था बारे जानकारी लिनका लागि जिल्ला प्रहरी कार्यालयका सूचना अधिकारी (९८५५०१३९९९) र जिल्ला ट्राफिक प्रहरी कार्यालयका प्रमुख (९८५५०१७०९९) लाई सम्पर्क गर्न पनि अनुरोध गरिएको छ।

जिल्ला प्रशासन कार्यालयका प्रमुख जिल्ला अधिकारी गणेश अर्यालले जारी सूचनामा यात्रु र सवारी चालकहरुलाई जोखिमपूर्ण अवस्था नबनाउन सचेत रहन आग्रह गरेका छन्।