जेन जि आन्दोलनका अगुवा रवि किरण हमाल पक्राउ, सात घण्टापछि रिहा — ‘संविधान पुनर्लेखन नभएसम्म सङ्घर्ष जारी’

काठमाडौँ, कात्तिक १६ गते । जेन जि आन्दोलनका अगुवा रवि किरण हमाल आइतबार काठमाडौँको माइतीघरबाट प्रहरीले नियन्त्रणमा लिएपछि सात घण्टापछि रिहा भएका छन्। सरकारले जेन जि विद्रोहका मागहरू पूरा नगरेको भन्दै हमालले युवाहरू माझ पुनः सडक आन्दोलनको आह्वान गरेका थिए। यही आह्वानका क्रममा उनलाई पक्राउ गरिएको काठमाडौँ प्रहरीले जनाएको छ।

हमाललाई पक्राउपछि काठमाडौँ प्रहरी परिसर हुँदै सिंहदरबार प्रहरी वृत्तमा राखिएको थियो। रिहा भएपछि सञ्चारकर्मीहरूसँग कुरा गर्दै उनले भने, “हाम्रो आन्दोलनले उठाएका संविधान पुनर्लेखन र सार्वजनिक संस्थाहरूको पुनर्संरचना जस्ता मूल मागहरू अझै सम्बोधन भएका छैनन्। त्यसैले हामी पुनः सडकमा उत्रिएका हौं।”

उनका अनुसार, भाद्र २३ र २४ गतेको जेन जि विद्रोहमा ७६ जनाले ज्यान गुमाएका थिए भने २३०० भन्दा बढी घाइते भएका थिए। “त्यो बलिदानको मूल्य अझै राज्यले बुझ्न सकेको छैन,” उनले थपे।

हमालले हालको राजनीतिक अवस्थाप्रति असन्तुष्टि जनाउँदै भने, “पुराना दलहरूले सुशीला कार्कीलाई चुनावी सरकारको नेतृत्व दिएपछि देश पुनः प्रति गमनतर्फ गएको छ। त्यो हाम्रो बनाएको सरकार होइन। राज्यविहीनताको फाइदा उठाएर सुशीला कार्कीहरूले कु गरे।”

उनले आन्दोलनका माग पूरा नभएसम्म संघर्ष जारी रहने बताएका छन्। “संविधान पुनर्लेखन र संस्थागत पुनर्संरचना नभएसम्म स्थायित्व र सुशासन सम्भव छैन। बलिदानको सम्मान गर्दै हामी अघि बढ्नेछौं,” हमालको भनाइ थियो।

पृष्ठभूमि:

भाद्र २३ र २४ गतेको “जेन जि विद्रोह” मा राजनीतिक रूपान्तरणको मागसहित हजारौं युवा सडकमा उत्रिएका थिए। सो क्रममा धेरैले ज्यान गुमाएका र सम्पत्तिको ठूलो क्षति भएको थियो। तर, आन्दोलनका मागहरू अझै अपूरा रहेको भन्दै त्यसका सहभागीहरूले फेरि नयाँ चरणको संघर्ष सुरू गरेका छन्।