सीमा अतिक्रमणमा मौनता तोड्न अध्यक्ष विशाल राज महतको आह्वान: ‘यो भोट नेपालको हो’

हेटौंडा, माघ ११ गते । सेवा सहयोग र आवाज अभियानका अध्यक्ष तथा सामाजिक अभियन्ता विशाल राज महतले नेपाल–भारत सीमा अतिक्रमणको विषयमा राज्य र राजनीतिक नेतृत्वको मौनता प्रति गम्भीर प्रश्न उठाउँदै नागरिक सचेतनाको आह्वान गरेको छ।

आफ्नो सामाजिक सञ्जाल मार्फत सार्वजनिक गरिएको धारणा मार्फत उनले निर्वाचनको समयमा राष्ट्रियताको नारा चर्को रूपमा सुनिए पनि व्यवहारमा सीमा मिचिँदा मौनता देखिनु चिन्ताजनक भएको बताएको छ। उनका अनुसार नेपाल–भारत सीमा जोडिएका २६ जिल्ला मध्ये २३ जिल्लामा सीमा अतिक्रमण भइसकेको छ भने ७१ स्थानमा करिब ६० हजार ६ सय ६८ हेक्टर नेपाली भूमि अतिक्रमणमा परेको छ।

दार्चुलादेखि झापासम्म, कञ्चनपुरका ९ स्थान, झापाका ८, सप्तरीका ७, पर्साका ६ र ताप्लेजुङका ४ स्थानमा सीमा समस्या देखिएको उल्लेख गर्दै महतले यसलाई केवल तथ्याङ्क नभई नेपालको इतिहास, स्वाभिमान र भावी पुस्ता माथिको अन्यायका रूपमा चित्रण गरेको छ।

“राष्ट्र बनाउने राजनीति चाहिन्छ भन्नेहरू राष्ट्रकै जग भूमि हराउँदा किन चुप लाग्छन्?” भन्दै उनले प्रश्न गरेको छ। सीमा अतिक्रमणमा बोल्न नसक्ने नेतृत्वले सत्ता पाएपछि राष्ट्र जोगाउँछ भन्ने विश्वास गर्न नसकिने उनको भनाइ छ।

आगामी निर्वाचन केवल प्रतिनिधि छान्ने प्रक्रिया नभई राष्ट्रको पक्षमा उभिने कि मौनताको साझेदार बन्ने भन्ने निर्णय गर्ने समय भएको उल्लेख गर्दै महतले नागरिकलाई भावनामा होइन, चेतनामा आधारित भएर मतदान गर्न आग्रह गरेको छ।

“यो भोट कुनै पार्टीको होइन, नेपालको हो,” भन्दै उनले भूमि जोगाउने, स्वाभिमानका पक्षमा बोल्न सक्ने र राष्ट्रियतालाई नाराबाट कर्ममा बदल्ने नेतृत्वलाई मतदान गर्नु पर्ने स्पष्ट धारणा राखेको छ।