बालज्योति माविको स्वर्ण जयन्तीमा मेयर मिना लामा: “हेटौडा सामुदायिक शिक्षाको केन्द्र बन्दैछ”

हेटौँडा, माघ १९ गते । हेटौडाले सामुदायिक (सरकारी) शिक्षाका माध्यमबाट देशमा ठूलो योगदान पुर्‍याउँदै आएको भन्दै हेटौडा उपमहानगरपालिकाकी मेयर मिना लामाले यहाँका सामुदायिक विद्यालयहरूप्रति गर्व व्यक्त गरेकी छन्।

हेटौडा–१५ स्थित बालज्योति माध्यमिक विद्यालयले आफ्नो ५० औँ जन्मजयन्ती तथा स्वर्ण जयन्ती मनाएको अवसरमा सामाजिक सञ्जालमार्फत शुभकामना सन्देश व्यक्त गर्दै मेयर लामाले विद्यालयको शैक्षिक योगदानको उच्च प्रशंसा गरेकी हुन्। उनले विद्यालयका संस्थापकहरू, हालसम्मका व्यवस्थापकहरू, यस विद्यालयबाट शिक्षा आर्जन गरेका सम्पूर्ण विद्यार्थीहरू तथा कर्मचारीहरूलाई हार्दिक बधाई तथा शुभकामना व्यक्त गरेकी छन्।

मेयर लामाका अनुसार हेटौडालाई शिक्षाको केन्द्र बनाउने सपना विस्तारै पूरा हुँदै गएको छ। “हामीले सामुदायिक विद्यालयमा आधुनिक तथा गुणस्तरीय शिक्षा र शिक्षणमा जोड दिँदै आएका छौँ,” उनले उल्लेख गरेकी छन्। उनले हेटौडा उपमहानगरपालिकाले यहाँका सामुदायिक विद्यालयहरूसँग हातेमालो गर्दै अगाडि बढ्ने कार्यलाई निरन्तरता दिँदै आएको पनि स्पष्ट पारेकी छन्। यस किसिमको सहकार्यले सामुदायिक शिक्षाको स्तर अभिवृद्धि हुनुका साथै सार्वजनिक शिक्षाप्रति नागरिकको विश्वास बढ्दै जाने अपेक्षा गरिएको छ।

बालज्योति माध्यमिक विद्यालयको स्वर्ण जयन्तीले हेटौडामा सामुदायिक शिक्षाको इतिहास, उपलब्धि र भविष्यप्रतिको प्रतिबद्धतालाई पुनः उजागर गरेको छ।