तारकेश्वर–१० मा शंकास्पद तरल पदार्थ छरिँदा स्थानीय त्रसित, स्वास्थ्य समस्या देखिन थाल्यो

काठमाडौं,बैशाख १८ गते । काठमाडौंको तारकेश्वर नगरपालिका–१० स्थित शुभम अस्पताल अगाडि बिहीबार दिउँसो एकाएक फैलिएको दुर्गन्ध र शंकास्पद तरल पदार्थका कारण स्थानीय बासिन्दा त्रसित बनेका छन्।

गएको वैशाख १७ गते भएको उक्त घटनामा निलो रङको एक सवारी साधनबाट अज्ञात तरल पदार्थ सडकमा छरिएको प्रारम्भिक जानकारी प्राप्त भएको छ। सो पदार्थबाट उत्पन्न तीव्र दुर्गन्धका कारण स्थानीयवासीहरूमा सास फेर्न गाह्रो हुने, आँखामा जलन, टाउको दुख्ने तथा बान्ता हुने जस्ता समस्या देखिन थालेको बताइएको छ।

घटनालाई गम्भीर रूपमा लिँदै तारकेश्वर नगरपालिकाले तत्काल नगर प्रहरी तथा नेपाल प्रहरीलाई घटनास्थलमा खटाई शंकास्पद सवारी साधनको खोजी तथा घटनाको यथार्थ पत्ता लगाउने कार्य तीव्र बनाएको जनाएको छ। साथै, सम्बन्धित प्राविधिक तथा स्वास्थ्य निकायहरूसँग समन्वय गरी उक्त पदार्थको प्रकृति, प्रभाव तथा सम्भावित जोखिमबारे परीक्षण र मूल्याङ्कन कार्य पनि अघि बढाइएको छ।

नगरपालिकाले नागरिकलाई स्वास्थ्यमा कुनै समस्या देखिएमा नजिकको स्वास्थ्य संस्था, वडा कार्यालय वा प्रहरी कार्यालयमा तुरुन्त सम्पर्क गर्न आग्रह गरेको छ। साथै, अपुष्ट वा भ्रामक सूचनामा विश्वास नगरी आधिकारिक स्रोतबाट प्राप्त जानकारी मात्र अनुसरण गर्न समेत अनुरोध गरिएको छ।

नगरपालिकाले घटनाको यथार्थ विवरण छिट्टै सार्वजनिक गर्ने तथा संलग्न व्यक्ति वा समूहको पहिचानका लागि आवश्यक समन्वय गरिरहेको जनाएको छ। सार्वजनिक सुरक्षा र स्वास्थ्यप्रति नगरपालिका पूर्ण रूपमा संवेदनशील रहेको बताउँदै नगरवासीहरूलाई संयमित, सचेत र सतर्क रहन आग्रह गरिएको छ।