‘जेन–जि विद्रोहपछि देश पूर्णरूपमा निर्वाचनमय बनेको छ’ : महेश नेपाली (आरोह)

हेटौँडा, माघ २३ गते । नेपाल कम्युनिस्ट पार्टी (माओवादी) का तर्फबाट मकवानपुर क्षेत्र नम्बर १ का प्रतिनिधिसभा उम्मेदवार महेश नेपाली (आरोह) ले जेन–जि विद्रोहपछिको राजनीतिक परिवेशले मुलुकलाई पूर्णरूपमा निर्वाचनमय बनाएको बताएका छन्।

फागुन २१ गते हुने प्रतिनिधिसभा निर्वाचनलाई लक्षित गर्दै रेडियो भरोसा युट्युब च्यानलले सञ्चालन गरेको ‘निर्वाचन विशेष संवाद’ कार्यक्रमको दोस्रो अङ्कमा सहभागी हुँदै उनले अहिले गाउँघरदेखि गल्ली, चोकचोकसम्म निर्वाचन केन्द्रित बहस र चासो व्यापक रूपमा चलेको बताए।

उनका अनुसार देश कुन दिशामा जाने, कुन राजनीतिक दल जनताको मन जित्न सफल हुन्छ, बहुमत कसले हासिल गर्छ भन्ने जिज्ञासाबीच नेपाली समाज अहिले गम्भीर छलफलको चरणमा गुज्रिरहेको छ। सोही सन्दर्भमा विप्लव नेतृत्वको नेपाल कम्युनिस्ट पार्टी (माओवादी) का उम्मेदवारका रूपमा आफू पछिल्लो समय घरदैलो तथा खुला कार्यक्रमहरूमा सहभागी हुँदै जनतासँग प्रत्यक्ष संवादमा रहेको उनले बताए।

“अहिले जनता नयाँ ढङ्गले आफ्नो मत प्रयोग गर्ने विषयमा उभिएको महसुस भइरहेको छ,” उनले भने, “पुरानो राजनीतिक प्रणाली र पुराना दलहरूले गरेका कमजोरी तथा खराब अभ्यासबाट देश मुक्त हुनुपर्छ भन्ने भावना समाजका विभिन्न तहमा व्यक्त भइरहेका छन्।”

मकवानपुर क्षेत्र नम्बर १ मा पनि यस्तै भावनाहरू व्यापक रूपमा देखिएको उल्लेख गर्दै उनले ‘नयाँ’ खोज्ने चाहना त बलियो भए पनि ‘नयाँ भनेको को हो ?’ भन्ने विषयमा मतदातामा केही भ्रम देखिएको बताए। “हावा हुन्डरी जस्तै नयाँको नाममा केही मतदाताहरू बहकिएको अवस्था पनि देखिन्छ,” उनले भने।

उनले आफ्नो पार्टीको तर्फबाट स्पष्ट सन्देश दिँदै नयाँ भन्ने नाममा होइन, विचार, राजनीतिक प्रतिबद्धता र देशभक्तिपूर्ण योगदानका आधारमा विकल्प छान्नुपर्नेमा जोड दिए। “नयाँ नेपाल निर्माणका लागि लामो समयदेखि संघर्ष गरेका, योगदान दिएका पार्टी र नेताहरूलाई रोज्नुपर्छ,” उनको भनाइ थियो।

चुनावी अभियानको सन्दर्भमा बोल्दै महेश नेपालीले संसाधनको सीमितताका कारण आफूले मुख्य रूपमा सामाजिक सञ्जाललाई प्रचारको माध्यम बनाएको बताए। “चुनाव भनेको खर्चिलो र कठिन प्रक्रिया हो। हामीसँग संसाधन सीमित छन्, त्यसैले सामाजिक सञ्जालमार्फत विचार सम्प्रेषणमा केन्द्रित छौं,” उनले भने। हालसम्म दुई–तीन स्थानमा मात्रै कोणसभा गरिएको उनले जानकारी दिए।

कार्यक्रमको अन्त्यमा मतदातालाई अपिल गर्दै उनले रूपचन्द्र बिष्टको भनाइ उद्धृत गर्दै चेतनाको महत्व औँल्याए। “सप्रेको देश थाहा पाएर सप्रिन्छ, बिग्रेको देश भ्रममा परेर बिग्रिन्छ,” भन्दै उनले अब देश बिगार्ने को हुन् र भ्रम फैलाउने को हुन् भन्ने चिन्नु जरुरी रहेको बताए।

उनले मतदातालाई पुराना शक्तिहरू र ‘नयाँ’ को नाममा फैलिएको भ्रमबाट मुक्त भएर नेपाल कम्युनिस्ट पार्टी (माओवादी) का उम्मेदवारलाई गुलाफ चिन्हमा मतदान गरी साथ दिन आग्रह गरे।