हेटौंडा–१६ मा शिवम सिमेन्टको धुलो–धुवाँबारे मुख्यमन्त्रीसँग छलफल, समाधानको आशा

हेटौंडा, फागुन ७ गते । हेटौंडा–१६ मा अवस्थित शिवम सिमेन्ट उद्योगबाट निस्किने धुलो–धुवाँका कारण वडा नं. १६ र १७ का स्थानीय बासिन्दा तथा नजिकैको विद्यालय लामो समयदेखि प्रभावित हुँदै आएका छन्। वातावरणीय र स्वास्थ्यसम्बन्धी समस्या बढ्दै गएपछि यस विषयमा सचेत नागरिक अभियान समूह “सेवा, सहयोग र आवाजमा हामी हेटौंडा” ले निरन्तर आवाज उठाउँदै आएको थियो।

सोही क्रममा आज बागमती प्रदेशका मुख्यमन्त्री इन्द्र बानियाको कार्यकक्षमा अभियानकर्मी, स्थानीय जनप्रतिनिधि तथा उद्योग पक्षबीच छलफल सम्पन्न भएको छ। छलफलमा समस्याको गम्भीरता प्रस्तुत गर्दै दीर्घकालीन समाधानका उपायहरूबारे विस्तृत रूपमा चर्चा गरिएको थियो।

अभियानका अध्यक्ष तथा सामाजिक अभियन्ता विशाल राज महतले आफू कुनै राजनीतिक उम्मेदवार नभई सचेत नागरिकका रूपमा जनताको पक्षमा उभिएको स्पष्ट पार्दै, जनस्वास्थ्य र वातावरणको संरक्षणका लागि आवाज उठाउनु आफ्नो दायित्व भएको बताएका छन्। मुख्यमन्त्रीबाट समस्या समाधानका लागि प्रतिबद्धता व्यक्त भएपछि अब सकारात्मक निष्कर्ष निस्कने विश्वास जागेको उनको भनाइ छ।

स्थानीय बासिन्दाले पनि यस पहललाई स्वागत गर्दै शीघ्र प्रभावकारी कार्यान्वयनको अपेक्षा गरेका छन्।