मदन भण्डारी स्वास्थ्य विज्ञान प्रतिष्ठानलाई राजनीतिक खेल मैदान नबनाउन वडाध्यक्ष सिग्देलको आग्रह

हेटौँडा, फागुन ३० गते । हेटौंडा उपमहानगरपालिका–४ का वडाध्यक्ष नवीन सिग्देलले मदन भण्डारी स्वास्थ्य विज्ञान प्रतिष्ठानलाई राजनीतिक खेल मैदान नबनाउन आग्रह गरेका छन्।

सामाजिक सञ्जालमार्फत धारणा सार्वजनिक गर्दै उनले स्वास्थ्य क्षेत्र संवेदनशील भएको उल्लेख गर्दै प्रतिष्ठानमा भएको प्रगति र परिवर्तनलाई स्वीकार गर्न सबैलाई आग्रह गरेका छन्।

उनले आजभन्दा करिब ६ वर्षअघि हेटौंडा अस्पतालको अवस्था निकै कमजोर रहेको स्मरण गराउँदै दैनिक करिब दुई सय बिरामी आउने, ५० शय्याको अस्पतालमा सीमित डाक्टर र नर्सको दरबन्दी मात्र रहेको तथा अस्पताल मुख्यतः बिरामी रिफर गर्ने केन्द्रजस्तै बनेको बताएका छन्।

त्यसपछि तत्कालीन बागमती प्रदेश सरकारको पहलमा २०७६ सालमा मदन भण्डारी स्वास्थ्य विज्ञान प्रतिष्ठान स्थापना भएको र हेटौंडा अस्पताललाई प्रतिष्ठानसँग गाभेर उपचार, अध्यापन र अनुसन्धानका तीन मुख्य कार्य अघि बढाइएको उनले उल्लेख गरेका छन्।

सिग्देलका अनुसार हाल प्रतिष्ठानअन्तर्गत ५ सय शय्याको अस्पताल सञ्चालनमा रहेको छ भने दैनिक हजारभन्दा बढी बिरामीले सेवा लिइरहेका छन्। अस्पतालमा ६० जना विशेषज्ञसहित करिब १५० जना डाक्टर तथा प्राध्यापक कार्यरत रहेका छन्।

अस्पतालमा तीन वटा अक्सिजन प्लान्ट, सुविधा सम्पन्न मातृशिशु कक्ष, दैनिक करिब ३० जनालाई डायलासिस सेवा, सिटी स्क्यान, एमआरआई, इको कार्डियोग्राम, टिएमटी, हल्टर, आईसियू, एचडियू तथा भिडियो एक्स–रेजस्ता अत्याधुनिक सेवा उपलब्ध रहेको उनले बताएका छन्। विशिष्ट प्रकृतिका केही अपरेशन बाहेक अधिकांश शल्यक्रिया यहीँ हुने अवस्था पुगेको पनि उनले जनाएका छन्।

अध्यापनतर्फ प्रतिष्ठानमा हाल बीएससी नर्सिङ, ल्याब टेक्निसियन, पब्लिक हेल्थ, फार्मेसी, एमबीबीएस तथा एमडी कार्यक्रम सञ्चालनमा रहेको र सयौं विद्यार्थी अध्ययनरत रहेको जानकारी उनले दिएका छन्।

अनुसन्धान क्षेत्रमा पनि ड्रग्स तथा टक्सिकोलोजी लगायत विभिन्न स्वास्थ्य समस्यासम्बन्धी अध्ययन भइरहेको र हालसम्म प्रतिष्ठानबाट ५५ वटा अनुसन्धान सम्पन्न भइसकेको उनले बताएका छन्।

वडाध्यक्ष सिग्देलले अस्पतालमा भएका उपलब्धि र सुधारलाई बेवास्ता गर्दै केवल कमी कमजोरी मात्र देख्ने प्रवृत्ति उचित नभएको उल्लेख गरेका छन्। अस्पतालमा स्वास्थ्यकर्मी र कर्मचारी प्रतिस्पर्धात्मक प्रक्रिया बिना भर्ना नभएको दाबी गर्दै उनले अनावश्यक आरोप र अफवाह फैलाएर स्वास्थ्यकर्मीलाई निरुत्साहित पार्ने काम नगर्न आग्रह गरेका छन्।

साथै अस्पतालभित्र विभिन्न समूहले प्रवेश गरी स्वास्थ्यकर्मी तथा कर्मचारीलाई निर्देशन दिने जस्ता गतिविधि अराजकता भएको उल्लेख गर्दै उनले सम्बन्धित निकायले नियमित अनुगमन गरी सेवा अझ प्रभावकारी बनाउनुपर्ने बताएका छन्।

“स्वास्थ्य क्षेत्र खेलवाड गर्ने ठाउँ होइन, यसलाई कसैले पनि राजनीतिक खेल मैदान बनाउने प्रयास गर्नु हुँदैन,” सिग्देलले भनेका छन्।