मोरङका कलेजहरूमा ग्लोबल मनी सप्ताहको अवसरमा बीमा सचेतना अन्तरक्रिया सम्पन्न

मोरङ, चैत ११ गते । ग्लोबल मनी सप्ताहको अवसरमा नेपाल बीमा प्राधिकरण, कोशी प्रदेश कार्यालयले विराटनगरका विभिन्न कलेजहरूमा बीमा सम्बन्धी अन्तरक्रिया कार्यक्रम सम्पन्न गरेको छ।

हिमालय दर्शन कलेज, सिटी कलेज तथा महेन्द्र मोरङ आदर्श बहुमुखी क्याम्पसमा फरक–फरक समयमा आयोजित उक्त कार्यक्रममा बीमाको महत्व, प्रकार, व्यवहारिक प्रयोग, चुनौती तथा नेपाली बीमा बजारको वर्तमान अवस्थाबारे विस्तृत छलफल गरिएको थियो। साथै, वित्तीय साक्षरताको आवश्यकता सम्बन्धी विषयमा पनि विद्यार्थीहरूलाई जानकारी गराइएको थियो।

कार्यक्रमको सञ्चालन नेपाल बीमा प्राधिकरण कोशी प्रदेश कार्यालयका सहायक प्रथम मिलन पोख्रेलले गरेका थिए। कार्यक्रममा कोशी प्रदेश प्रमुख प्रीति देवले बीमाका सैद्धान्तिक तथा व्यवहारिक पक्षबारे जानकारी दिँदै प्राधिकरणको भूमिका, कर्तव्य र अधिकारबारे विद्यार्थी तथा शिक्षकहरूलाई सुसूचित गराउने उद्देश्य रहेको बताइन्।

उनले नेपालको समग्र वित्तीय प्रणालीको परिचय प्रस्तुत गर्दै बीमा क्षेत्रको आवश्यकता र यसमा देखिएका चुनौतीहरूबारे प्रकाश पारिन्। देवका अनुसार बीमा क्षेत्रको विकासका लागि युवाहरूको सक्रिय सहभागिता आवश्यक रहेको उल्लेख गर्दै यस्ता कार्यक्रमले विद्यार्थीहरूलाई बीमा क्षेत्रमा आकर्षित गर्न सहयोग पुग्ने विश्वास व्यक्त गरिन्।

कार्यक्रमअन्तर्गत हाजिरीजवाफ प्रतियोगिता समेत आयोजना गरिएको थियो, जसले विद्यार्थीहरूमा थप उत्साह सिर्जना गरेको थियो। समापनका क्रममा सहभागीहरूले उठाएका जिज्ञासाहरूको समाधान गर्दै प्रीति देवले बीमा क्षेत्रमा दक्ष जनशक्तिको अभाव रहेको उल्लेख गरिन् र यस क्षेत्रमा भविष्यको सम्भावना उज्ज्वल रहेको बताइन्।

यसैबीच, प्राधिकरणद्वारा सञ्चालन गरिएको निबन्ध लेखन प्रतियोगिताबारे पनि जानकारी गराइएको थियो। आगामी दिनमा यस्ता सचेतनामूलक कार्यक्रमलाई निरन्तरता दिने प्रतिबद्धता समेत व्यक्त गरिएको छ।