माइतीघर घटनामा निष्पक्ष छानबिनको माग, “पीडितमाथि दमन अस्वीकार्य”

काठमाडौं,बैशाख १४ गते । काठमाडौंको माइतीघर क्षेत्रमा भएको घटनाप्रति नेकपा (एमाले) का सचिव महेश बस्नेतले गम्भीर आपत्ति जनाएका छन्। सामाजिक सञ्जाल मार्फत प्रतिक्रिया दिँदै उनले साइबर अपराधविरुद्ध उजुरी दिन साइबर ब्युरो जाने क्रममा आफ्ना परिवारका सदस्यहरू दुर्व्यवहारको सिकार भएको बताएका छन्।

उनका अनुसार, माइतीघर क्षेत्रमा केही व्यक्तिहरूले महिलामाथि गालीगलौज गर्नुका साथै हातपातसमेत गरेका थिए। सो क्रममा आफ्नी श्रीमतीसहित आठ जनालाई प्रहरीले नियन्त्रणमा लिएको भन्दै उनले असन्तुष्टि व्यक्त गरेका छन्।

बस्नेतले घटनालाई केही सञ्चार माध्यमहरूले भ्रामक रूपमा प्रस्तुत गरेको आरोप लगाउँदै यसले पीडितको चरित्र हत्या गर्ने प्रयास भएको बताएका छन्। माइतीघर मण्डला जस्तो सार्वजनिक स्थललाई कसैलाई बदनाम गर्ने थलोका रूपमा प्रयोग गरिनु निन्दनीय भएको उनको भनाइ छ।

उनले सरकारको भूमिकाप्रति पनि प्रश्न उठाउँदै यस्तो संवेदनशील विषयमा मौन बस्नु उपयुक्त नहुने बताएका छन्। पीडित आफैं न्याय खोज्नुपर्ने अवस्था सिर्जना हुनु र उल्टै उनीहरूमाथि दमन हुनु लोकतान्त्रिक अभ्यासका लागि राम्रो संकेत नभएको उनको भनाइ छ।

बस्नेतले सम्बन्धित निकायलाई घटनाको निष्पक्ष छानबिन गरी दोषीमाथि कारबाही गर्न आग्रह गरेका छन्। अन्यथा सशक्त प्रतिरोध हुने चेतावनीसमेत उनले दिएका छन्।