“सुन्ने होइन, गर्ने समयः आफ्नै घरबाट सुरु होस् जवाफदेहिता” — सामाजिक अभियन्ता विशालराज महतको खबरदारी

हेटौंडा,बैशाख १५ गते । राष्ट्रिय स्वतन्त्र पार्टी (रास्वपा) का नवनिर्वाचित जनप्रतिनिधिहरू यतिबेला “जनताको मुद्दा सुन्ने” अभियानअन्तर्गत सार्वजनिक सुनुवाइमा व्यस्त देखिएका छन्। सामाजिक सञ्जालहरूमा पनि “माननीयको निर्देशन अनुसार…” भन्ने भावनाले भरिएका पोस्टहरू व्यापक रूपमा साझा भइरहेका छन्। यसले जनप्रतिनिधिहरूप्रति अपेक्षा र आशा दुवै बढाएको देखिन्छ।

तर यही सन्दर्भमा सामाजिक अभियन्ता तथा “सेवा सहयोग र आवाज” अभियानका अध्यक्ष विशालराज महतले कडा खबरदारी गरेका छन्। उनले आफ्नो फेसबुक स्टाटसमार्फत सार्वजनिक सुनुवाइ कार्यक्रमप्रति प्रश्न उठाउँदै यसलाई “सुनुवाइ कि अभिनय?” भन्ने रूपमा टिप्पणी गरेका छन्।

महतका अनुसार जनताको मुद्दा सुन्नु अघि राजनीतिक दलहरूले आफ्नै पार्टीभित्रको अनुशासन, नैतिकता र उत्तरदायित्व सुनिश्चित गर्नुपर्छ। उनले आफ्नै पार्टीका स्थानीय नेतामाथि गालीगलौज र ज्यान मार्ने धम्की दिने व्यक्तिहरूलाई संरक्षण दिने प्रवृत्तिमाथि आपत्ति जनाएका छन्। “यस्तो व्यवहारले जनतामा कस्तो सन्देश जान्छ?” भन्ने प्रश्न उनले उठाएका छन्।

उनले हेटौंडा क्षेत्रका विभिन्न ज्वलन्त मुद्दाहरू पनि उठाएका छन्। शिवम् सिमेन्ट उद्योगका कारण विद्यालय र वडा नं. १६–१७ का बासिन्दाको स्वास्थ्यमा परेको असर, “सुरुङ मार्ग” नाममा उठाइएको ३४ करोड रुपैयाँको पारदर्शिता, मिटरब्याज पीडितहरूको समस्या, लागुपदार्थ ओसारपसार, होटलहरूमा बढ्दो यौन व्यवसाय, सुकुम्बासी समस्या तथा बहुचर्चित “२५ मिटर” प्रकरणजस्ता विषयलाई उनले तत्काल समाधान गर्नुपर्ने बताएका छन्।

महतले यस्ता समस्याहरू केवल मञ्चमा बोलेर वा सामाजिक सञ्जालमा प्रचार गरेर समाधान नहुने स्पष्ट पार्दै व्यवहारमा परिणाम देखाउनुपर्नेमा जोड दिएका छन्। “अब सुन्ने होइन, गर्ने समय हो,” उनले लेखेका छन्।

उनले जनप्रतिनिधिहरूलाई चेतावनी दिँदै भनेका छन् कि जनताले सबै गतिविधि नियालिरहेको छ र अब केवल देखावटी कार्यक्रमले विश्वास जित्न नसकिने अवस्था आएको छ। “खबरदारी गर्नु दायित्व हो र काम गराउन दबाब दिनु अधिकार,” महतको निष्कर्ष छ।