हेटौंडाको सिद्धार्थ माविमा १३ महिनादेखि समिति विहीनता: लापरबाहीको रहस्य खुलासा, तत्काल गठनको माग

हेटौंडा.बैशाख १५ गते । हेटौंडा उपमहानगरपालिका–२ अन्तर्गत रहेको सिद्धार्थ माध्यमिक विद्यालयमा १३ महिनादेखि व्यवस्थापन समिति गठन नभएको विषय सार्वजनिक भएको छ। सेवा सहयोग र आवाजमा नेपालका अध्यक्ष तथा सामाजिक अभियान्ता विशालराज महतले आफ्नो सामाजिक सञ्जाल फेसबुकमार्फत यसबारे गम्भीर प्रश्न उठाउँदै लापरबाहीको रहस्य उजागर गरेका छन्।

उनका अनुसार २०८१ साल वैशाख १५ गते विद्यालय व्यवस्थापन समिति विघटन भएयता अहिलेसम्म नयाँ समिति गठन हुन सकेको छैन। विद्यालय जस्तो संवेदनशील संस्थालाई लामो समयसम्म नेतृत्वविहीन बनाइ राख्नु केवल प्रशासनिक कमजोरी मात्र नभई शैक्षिक प्रणालीमाथिको प्रत्यक्ष अन्याय भएको उनले बताएका छन्।

महतले राजनीतिक भागबन्डा नमिल्दा समिति गठन प्रक्रिया अवरुद्ध हुनु अत्यन्तै अस्वीकार्य भएको उल्लेख गरेका छन्। यस्तो अवस्थाले विद्यालयको निर्णय प्रक्रिया ठप्प हुनु, योजना कार्यान्वयनमा ढिलाइ हुनु र स्रोत–साधनको दुरुपयोग हुने जोखिम बढेको उनको भनाइ छ। यसले विद्यार्थीको भविष्यमा नकारात्मक असर पारिरहेको उनले चिन्ता व्यक्त गरेका छन्।

उनले सम्बन्धित निकायलाई तत्काल जिम्मेवारी बोध गर्दै विद्यालय व्यवस्थापन समिति गठन गर्न आग्रह गरेका छन्। अन्यथा जिम्मेवार पक्षमाथि विद्यार्थीको भविष्यप्रति गैरजिम्मेवार व्यवहार गरेको आरोप लाग्नु स्वाभाविक हुने उनले चेतावनी दिएका छन्।

शिक्षा जस्तो आधारभूत अधिकारमाथि खेलबाड गर्न नहुने उल्लेख गर्दै महतले अब पनि ढिलाइ भए भोलिका पुस्ताले यसको गम्भीर मूल्य चुकाउनुपर्ने बताएका छन्। उनले विद्यालयलाई राजनीति होइन, जिम्मेवार र सक्षम नेतृत्व आवश्यक रहेकोमा जोड दिएका छन्।