निजामती सेवामा पार्टीको नाम दुरुपयोगप्रति रास्वपाको आपत्ति, तटस्थता र मेरिटोक्रेसीमा जोड

काठमाडौं, चैत १३ गते । राष्ट्रिय स्वतन्त्र पार्टी (रास्वपा) ले निजामती सेवाभित्र आफ्नो पार्टी र नेतृत्वको नाम जोडेर भ्रम सिर्जना गर्ने गतिविधिप्रति गम्भीर ध्यानाकर्षण भएको जनाएको छ। पार्टीले शुक्रबार एक विज्ञप्ति जारी गर्दै यस्ता कुनै पनि समूह, अभियान वा युनियन शैलीका संयन्त्रहरूसँग आफ्नो कुनै सम्बन्ध, समर्थन वा संलग्नता नरहेको स्पष्ट पारेको हो।

विज्ञप्तिमा रास्वपाले स्थापना कालदेखि नै सार्वजनिक प्रशासनलाई राजनीतिक हस्तक्षेपमुक्त, व्यावसायिक र जनउत्तरदायी बनाउनुपर्ने मान्यता राख्दै आएको उल्लेख गरिएको छ। हालै सम्पन्न आम निर्वाचनमा समेत निजामती सेवालाई तटस्थ, निष्पक्ष र व्यवसायिक बनाउँदै सार्वजनिक सेवा प्रवाह तथा विकास व्यवस्थापनलाई प्रभावकारी बनाउने प्रतिबद्धता गरिएको पार्टीले जनाएको छ।

पछिल्लो समय निजामती सेवाभित्र विभिन्न नाममा समूह गठन गरी पार्टी र नेतृत्वको नाम जोडेर भ्रम फैलाउने प्रयास भइरहेको सूचनाप्रति पार्टीले चिन्ता व्यक्त गरेको छ। यस्तो गतिविधिबाट सचेत रहन कर्मचारी तथा सरोकारवालाहरूलाई आग्रह गर्दै रास्वपाले कसैले आफ्नो स्वार्थ पूरा गर्न पार्टीको नाम दुरुपयोग गरेमा त्यसमा नफस्न अपिल गरेको छ।

पार्टीले कर्मचारीको प्रमुख धर्म ‘जनसेवा’ र पहिचान ‘व्यावसायिकता’ हुनुपर्ने धारणा पुनः दोहोर्‍याउँदै कुनै पनि राजनीतिक दल वा शक्ति केन्द्रको प्रभावमा प्रशासनिक संयन्त्र चल्नु नहुने स्पष्ट पारेको छ। साथै, निजामती सेवामा ‘मेरिटोक्रेसी’ अर्थात् योग्यता प्रणालीका आधारमा सञ्चालन हुनुपर्नेमा जोड दिँदै कर्मचारीहरू राज्य र जनताप्रति मात्र उत्तरदायी हुनुपर्ने बताइएको छ।

रास्वपाले विगतमा देखिएका दलीय हस्तक्षेप, त्रास सिर्जना गर्ने प्रवृत्ति तथा राजनीतिक आडमा काम गर्ने संस्कृतिको अन्त्य हुनुपर्नेमा जोड दिँदै सम्पूर्ण राष्ट्रसेवक कर्मचारीहरूलाई पूर्ण तटस्थ, निष्पक्ष र जिम्मेवार भई जनताको सेवामा समर्पित हुन आग्रह गरेको छ।

उक्त विज्ञप्तिमा पार्टीका महामन्त्री कविन्द्र बुर्लाकोटीको हस्ताक्षर रहेको छ।