राइड सेयरिङ चालकद्वारा अपशब्दसहितका भिडियो पोष्ट नगर्न प्रहरीको चेतावनी

काठमाडौँ,बैशाख ९ गते । सामाजिक सञ्जालमा राइड सेयरिङ सेवामा आबद्ध केही चालकहरूले सेवाग्राहीसँग भएका व्यक्तिगत कुराकानी सार्वजनिक गर्दै अपशब्द प्रयोग गरी भिडियो भ्लग बनाउने तथा पोष्ट गर्ने प्रवृत्ति बढ्दै गएकोप्रति जिल्ला प्रहरी परिसर काठमाडौँले गम्भीर ध्यानाकर्षण जनाएको छ।

प्रहरीले यस्ता गतिविधिले व्यक्तिको गोपनीयता हनन गर्नुका साथै सामाजिक मर्यादा र कानुनी व्यवस्थामाथि प्रत्यक्ष असर पार्ने जनाएको छ। सेवाग्राहीसँगको निजी संवादलाई अनुमति बिना सार्वजनिक गर्नु तथा अपमानजनक भाषा प्रयोग गर्नु कानूनविपरीत हुने भन्दै तत्काल त्यस्ता भिडियोहरू हटाउन र भविष्यमा यस्ता कार्य नगर्न आग्रह गरिएको छ।

जिल्ला प्रहरी परिसर काठमाडौँले सबै राइड सेयरिङ चालक तथा सम्बन्धित पक्षलाई जिम्मेवार र मर्यादित व्यवहार अपनाउन अनुरोध गर्दै अन्यथा यस्ता गतिविधिमा संलग्न जो कोहीलाई पनि तत्काल कानुनी दायरामा ल्याइने स्पष्ट चेतावनी दिएको छ।

प्रहरीले सामाजिक सञ्जालको जिम्मेवार प्रयोग गर्न सबैलाई सचेत रहन पनि आग्रह गरेको छ।