प्रतिवन्धित औषधिहरूको बिक्री बितरण रोक्न औषधि व्यवसायीहरूको माग

काठमाडौं – औषधि व्यवसायीहरूले प्रतिवन्धित औषधिहरूको बिक्री बढेको बताएका छन् । औषधि व्यवसायी डा. सन्तोष केसीले फार्मेसीहरूमा विकृति बढेको बताए । उनले रोक लगाइएका औषधिहरू गैरकानुनी रुपमा बेच्ने काम भइरहेको भन्दै यसलाई सरकारले समयमा नै निरीक्षण गरी कारबाही गर्नुपर्नेमा जोड दिए । उनले अमर्यादित रुपमा व्यवसायहरू सञ्चालन भइरहेको भन्दै सरकारले निरीक्षण गर्नु पर्ने बताए । “विभिन्न रोक लगाइएका औषधिहरू गैरकानुनी रुपमा बेच्ने प्रवृत्ति बढेको छ । यसलाई निरुत्साहीत गर्नुपर्छ,” उनी भन्छन् ।

औषधि व्यवसायीहरूले औषधि व्यवसायीहरूलाई पनि बीमामा जोड्न माग गरेका छन् । शुक्रबार नेपाल औषधि व्यवसायी संघको दोस्रो वार्षिक साधारण सभामा उनीहरूले यस्तो माग राखेका हुन् । कायक्रममा वाग्मती प्रदेशका औषधि विभागका अध्यक्ष ध्रुवनारायण श्रेष्ठले औषधि व्यवसायीहरुलाई बीमामा जोड्न नसके निकट भविष्यमा नै औषधि पसलहरू बन्द गर्नुपर्ने अवस्था सिर्जना हुने बताए । उनले बीमामा औषधि व्यवसायीहरूलाई किन सरकारले संलग्न गर्न नसकेको भन्दै प्रश्न गरे । अध्यक्ष श्रेष्ठले औषधि व्यवसायीलाई पनि बीमामा आबद्ध गराएर व्यवसाय सुरक्षित गर्नुपर्नेमा जोड दिए ।

कार्यक्रममा औषधि व्यवसायी डा. केसीले नेपालमा औषधि फार्मेसीहरूलाई घटाइ व्यवस्थित गर्नुपर्ने धारणा राखे । औषधि पसलहरू नियन्त्रित व्यवसायभित्र पर्ने भएकाले राज्यले निरीक्षण गर्नुपर्नेमा उनको जोड छ । “नेपाल एकदमै धेरै फार्मेसी भएको ठाउँ रहेछ । अमेरिकामा भन्दा पनि धेरै फार्मेसी नेपालमा रहेछन् । १८ सयजना बराबर एउटा फार्मेसी रहेछ, यस्तो कतै पनि हुँदैन । औषधि पसलहरू भनेको नियन्त्रित व्यवसाय भित्र पर्छ, यो एउटा उपभोग्य वस्तु भए पनि अन्य किसिमका वस्तुजस्तो होइन,” उनले भने ।