नेपाल पत्रकार महासङ्घको आपत्ति: अख्तियार अधिकारीद्वारा पत्रकारलाई भिडियो खिच्न रोक लगाइएको घटनाप्रति कडा प्रतिक्रिया

काठमाडौँ,चैत २५ गते । नेपाल पत्रकार महासङ्घले अख्तियार दुरुपयोग अनुसन्धान आयोग पोखराका प्रमुख सहसचिव नारायण प्रसाद रेग्मीले सार्वजनिक कार्यक्रममा पत्रकारलाई भिडियो खिच्न रोक लगाएको घटनाप्रति गम्भीर ध्यानाकर्षण जनाएको छ।

महासंघद्वारा जारी प्रेस विज्ञप्तिअनुसार, चैत्र २४ गते व्यास नगरपालिकाको सभाहलमा आयोजित कार्यक्रममा रेग्मीले आफ्नो मन्तव्यका क्रममा पत्रकारहरूलाई तस्बिर तथा भिडियो खिच्न रोक लगाएका थिए। उक्त घटनाबारे महासंघ तनहुँ शाखाले जानकारी गराएको हो।

महासंघले संवैधानिक निकायका जिम्मेवार अधिकारीबाट नागरिकलाई सुसूचित गराउने कर्तव्य निर्वाह गरिरहेका पत्रकारहरूको स्वतन्त्रतामाथि यस्तो हस्तक्षेप हुनु अत्यन्त निन्दनीय भएको जनाएको छ। प्रेस स्वतन्त्रता लोकतन्त्रको आधारभूत स्तम्भ भएको उल्लेख गर्दै महासंघले यस घटनालाई प्रेस स्वतन्त्रताविरुद्धको कदमका रूपमा लिएको छ।

विज्ञप्तिमा भनिएको छ कि यस्ता कार्यहरूले संविधानले सुनिश्चित गरेको सूचनाको हक तथा अभिव्यक्ति स्वतन्त्रतामाथि प्रत्यक्ष असर पार्ने भएकाले सम्बन्धित निकायले गम्भीरतापूर्वक ध्यान दिनुपर्ने आवश्यकता औँल्याइएको छ।

महासंघका महासचिव रामप्रसाद दाहालले आगामी दिनमा यस्ता गतिविधि दोहोरिन नदिन सम्बन्धित निकायलाई सचेत रहन आग्रह गरेका छन्।