पुराना गाडीलाई विद्युतीयमा रूपान्तरण गर्न कानुनी सुधार आवश्यक : महावीर पुन

काठमाडौँ,चैत २५ गते । प्रतिनिधिसभा सदस्य तथा वैज्ञानिक महावीर पुनले नेपालमा पुराना सवारी साधनलाई विद्युतीय गाडीमा रूपान्तरण गर्न विद्यमान कानुनी संरचनामा सुधार आवश्यक रहेको बताएका छन्।

सामाजिक सञ्जाल मार्फत धारणा सार्वजनिक गर्दै उनले यस्तो कार्य अघि बढाउन पहिलो कदमका रूपमा हालसम्म बनेका ऐन, नियमावली, कार्यविधि र मापदण्ड संशोधन गर्नुपर्ने बताएका हुन्। उनका अनुसार, विद्यमान कानुनी व्यवस्था व्यवसायीहरूका लागि सहज नभएकाले त्यसलाई व्यावहारिक बनाउनु आवश्यक छ।

पुनले सम्बन्धित ऐन, नियमावली र कार्यविधिको गहन अध्ययन गरी सुधारका लागि सुझाव संकलन गरिने जानकारी दिएका छन्। यसका लागि विज्ञहरूसँग छलफल गर्न एक हप्ताभित्र बैठक आयोजना गरिने पनि उनले उल्लेख गरेका छन्।

यस अभियानमा सहभागी हुन इच्छुक विज्ञहरूलाई उनले एसएमएस मार्फत ९८४१५९२३६१ नम्बरमा सम्पर्क गर्न आह्वान गरेका छन्।

नेपालमा विद्युतीय सवारी साधनको प्रयोग बढ्दै गएको सन्दर्भमा पुराना गाडीलाई विद्युतीयमा रूपान्तरण गर्ने पहलले वातावरण संरक्षण र ऊर्जा बचतमा टेवा पुग्ने अपेक्षा गरिएको छ।