हेटौँडामा जनजाति संग्रहालय सञ्चालनको तयारी अन्तिम चरणमा, असार अन्त्यसम्म खुल्ने

हेटौँडा,बैशाख १० गते । हेटौँडास्थित सहिद स्मारक परिसरमा निर्माणाधीन जनजाति संग्रहालय सञ्चालनको तयारी अन्तिम चरणमा पुगेको छ। स्मारक विकास समितिका अनुसार संग्रहालय आगामी असार महिनाको अन्तिम सातासम्म सञ्चालनमा ल्याइने लक्ष्य राखिएको छ।

संग्रहालय सञ्चालनका लागि विभिन्न आदिवासी जनजाति संगठनका अगुवाहरूसँग छलफल तथा अन्तरक्रिया कार्यक्रम सम्पन्न गरिएको छ। समितिका सदस्य नवीन सिग्देलका अनुसार उक्त कार्यक्रममार्फत आवश्यक सामग्री संकलन र व्यवस्थापनबारे महत्वपूर्ण सुझावहरू प्राप्त भएका छन्।

छलफलमा स्मारक विकास समितिका अध्यक्ष तथा बागमती प्रदेशका प्रथम मुख्यमन्त्री डोरमणि पौडेलले आदिवासी जनजाति समुदायको पहिचान झल्किने भेषभूषा, रहनसहन, भाषा, संस्कृति तथा रीतिरिवाज सम्बन्धी सामग्री संग्रहालयमा राखिने जानकारी दिए। उनका अनुसार संग्रहालय केवल अवलोकनस्थल मात्र नभई अध्ययन र अनुसन्धानको केन्द्रको रूपमा समेत विकास गरिनेछ। यसले विभिन्न जातजातिको संस्कार, मूल्य र परम्पराको संरक्षण तथा प्रवर्द्धनमा महत्वपूर्ण भूमिका खेल्ने विश्वास व्यक्त गरिएको छ।

हाल चेपाङ, तामाङ, नेवार, थारू, माझी, मगर, गुरुङ, राई, लिम्बू, सुनुवार, बनकरिया, पहरी लगायत विभिन्न जनजातिहरूको सांस्कृतिक पहिचान झल्काउने सामग्री संकलन कार्य अगाडि बढाइएको छ।

यसैबीच, संग्रहालय सञ्चालनका लागि आवश्यक सामग्री संकलन तथा समन्वय गर्न रामकृष्ण थापाको संयोजकत्वमा एक समन्वय समिति गठन गरिएको छ। समितिमा विभिन्न जनजातिका प्रतिनिधिहरू सदस्यको रूपमा सहभागी छन्।

कार्यक्रममा स्मारक विकास समितिका पदाधिकारीहरू, नेपाल आदिवासी जनजाति महासंघ मकवानपुरका प्रतिनिधि तथा विभिन्न जातीय संगठनका अगुवाहरूको सहभागिता रहेको थियो।