एआई र खोजमूलक पत्रकारिता अपनाउनुपर्नेमा जोड, महिला पत्रकारलाई प्रविधिमैत्री बनाउने पहल

धुलिखेल,बैशाख १३ गते । नेपाल पत्रकार महासंघ बागमती प्रदेशका अध्यक्ष कृष्ण सारु मगरले परम्परागत पत्रकारिता मात्रको भरमा प्रतिस्पर्धी मिडिया क्षेत्रमा टिकिरहन कठिन बन्दै गएको बताएका छन्। उनले आर्टिफिसियल इन्टेलिजेन्स (एआई) जस्ता अत्याधुनिक प्रविधिको प्रयोग गर्दै खोजमूलक पत्रकारितामा केन्द्रित हुनुपर्ने आवश्यकता औंल्याए।

बागमती प्रदेश सरकारको सामाजिक विकास मन्त्रालयको आयोजना तथा नेपाल पत्रकार महासंघ बागमती प्रदेशको समन्वयमा धुलिखेलमा सम्पन्न दुई दिने ‘खोजमूलक पत्रकारिता तथा एआईको प्रयोग’ सम्बन्धी अभिमुखीकरण कार्यक्रमको समापन सत्रमा बोल्दै अध्यक्ष मगरले यस्तो धारणा राखेका हुन्।

उनले एआईको प्रयोगले पत्रकारितालाई थप प्रभावकारी, तथ्यपरक र समयानुकूल बनाउन सक्ने उल्लेख गर्दै विशेषगरी महिला पत्रकारहरूलाई प्रविधिमैत्री बनाउने र सामाजिक विकाससँग सम्बन्धित विषयहरू गहिराइबाट उठाउन यस्ता कार्यक्रम उपयोगी हुने बताए।

अध्यक्ष मगरले निजी तथा सामुदायिक सञ्चारमाध्यमले आमसञ्चार क्षेत्रमा महत्वपूर्ण योगदान पुर्‍याउँदै आएको उल्लेख गर्दै सरकारी विज्ञापन वितरण प्रणालीमा सुधार आवश्यक रहेको बताए। उनले सरकारी विज्ञापन सरकारी सञ्चारमाध्यममा मात्र सीमित गर्ने व्यवस्था अन्त्य गरी सबै सञ्चारमाध्यमलाई समान अवसर दिनुपर्ने माग गरे। साथै विज्ञापन वितरण प्रक्रियालाई बिचौलिया मुक्त, पारदर्शी र निष्पक्ष बनाउनुपर्नेमा जोड दिए।

कार्यक्रमका सभाध्यक्ष तथा सामाजिक विकास मन्त्रालयका सचिव खुविराम अधिकारीले तालिमबाट प्राप्त ज्ञान र सीप व्यवहारमा उतार्न सहभागीहरूलाई आग्रह गरे। उनले आगामी दिनमा यस्ता कार्यक्रमलाई अझ प्रभावकारी र परिष्कृत बनाउने प्रतिबद्धता व्यक्त गरे।

नेपाल पत्रकार महासंघ काभ्रेका अध्यक्ष विनोद न्यौपानेले सामाजिक सञ्जालको बढ्दो प्रभावका बीच महिला पत्रकारहरूको पलायन रोक्न यस्ता क्षमता अभिवृद्धि कार्यक्रम महत्वपूर्ण हुने विश्वास व्यक्त गरे।

दुई दिने प्रशिक्षणमा सरिता दाहालले महिला पत्रकारको सुरक्षा र लैंगिक समानता, नितु पण्डितले पत्रकार आचारसंहिता तथा फेक न्यूज र अजय शर्माले एआई प्रयोग गरी समाचार सामग्री निर्माणबारे प्रशिक्षण दिएका थिए। कार्यक्रममा बागमती प्रदेशका १३ जिल्लाबाट २१ जना सक्रिय महिला पत्रकारहरूको सहभागिता रहेको थियो।