शिवम् सिमेन्टविरुद्ध आन्दोलनको घोषणा: “जनताको स्वास्थ्यसँग खेलवाड अब सहिन्न” — विशालराज महत

हेटौडा,बैशाख १८ गते । शिवम् सिमेन्ट उद्योगबाट निस्कने धुवाँ–धुलोका कारण स्थानीय बासिन्दाको स्वास्थ्यमा गम्भीर असर परेको भन्दै सामाजिक अभियान्ता तथा सेवा सहयोग र आवाज अभियानका अध्यक्ष विशालराज महतले कडा विरोध जनाउँदै आन्दोलनको घोषणा गरेका छन्।

महतले सामाजिक सञ्जाल फेसबुक मार्फत सार्वजनिक गरेको आफ्नो धारणा मार्फत उद्योगको ज्यादती दिनानुदिन बढ्दै गएको आरोप लगाएका छन्। पटक–पटक आवाज उठाउँदा पनि समस्या समाधान हुन नसकेको र जनताको आन्दोलनलाई कमजोर बनाउन विभिन्न बहानाहरू प्रयोग गरिएको उनले उल्लेख गरेका छन्।

१७ नम्बर वडाध्यक्षको संयोजकत्वमा गठन गरिएको समिति पनि समस्या समाधानभन्दा जनतालाई झुक्याउने उद्देश्यले बनाइएको अहिले स्पष्ट भएको महतको दाबी छ। समिति बनेपछि पनि उद्योगबाट निरन्तर धुवाँ–धुलो उडिरहेको भिडियो तथा तस्बिरहरू सार्वजनिक हुँदै आएको उनले बताएका छन्।

केही समय “सुधार हुँदै होला” भन्ने आशामा मौन बसे पनि पछिल्ला प्रमाणहरूले यो अवस्था सुधार नभई जनताको स्वास्थ्यप्रति गम्भीर लापरबाही भएको पुष्टि गरेको उनले उल्लेख गरेका छन्। उनले यस अवस्थालाई “संगठित बेवास्ता” र “जनतामाथिको हेपाहा प्रवृत्ति”को संज्ञा दिएका छन्।

महतका अनुसार अब चुप लागेर बस्ने अवस्था समाप्त भएको छ। “जनताको स्वास्थ्यभन्दा ठूलो कुनै पनि उद्योग, पैसा वा राजनीतिक स्वार्थ हुन सक्दैन,” उनले भनेका छन्।

आन्दोलनका कार्यक्रमअन्तर्गत संघर्ष, प्रतिकार र घेराउका कार्यक्रम अघि बढाइने जानकारी दिँदै उनले नगरपालिका, वातावरण शाखा, उद्योग मन्त्रालयलगायत सम्बन्धित निकायलाई दबाब सिर्जना गर्न सबै सरोकारवालाहरूलाई एकजुट हुन आह्वान गरेका छन्।

“अति गर्नु अत्याचार हो, अब अत्याचार सहिन्न,” भन्दै उनले जनताको स्वास्थ्यसँग खेलवाड गर्नेहरूलाई जवाफदेही बनाइने चेतावनी दिएका छन्। “यो चेतावनी होइन—यो संघर्षको घोषणा हो,” महतले उल्लेख गरेका छन्।